Александр Николаевич МАТРОСОВ
Үлэ бэтэрээнэ

Александр Николаевич 1937 сыллаахха төрөөбутэ. Сэрии сылларын оҕотун ыар дьылҕатын этинэн- хаанынан билэн улааппыта. Кини ахтыытыгар маннык суруйар: « Аҕа дойду сэриитэ киһи аймахха улахан суостаах сэрии этэ. Ордук хоту дойду норуоттара имири эстэ сыспыттара. Ордук сэрии кэмигэр тулаайах хаалбыт кыра оҕолорго кытаанах этэ. Хоргуйуу, аччыктааһын, өлүү- сүтүү, сороҕор ыал ыалынан эстэрэ. Биһиги да аймах онтон туора турбатаҕа. Биһиги аҕабыт сэриигэ барарыгар 1942 сыллаахха ийэбитинээн биэс оҕо буолан хаалбыппыт. Мин саҥа түөрт саастаах этим. Мин анныбынан икки кыра оҕо баара: икки саастаах уол оҕо уонна балтым биһиккэ сытар оҕо. Кыра икки оҕолор хоргуйан кэриэтэ өлбүттэрэ. Биир бэйэм хайдах тыыннаах аччык дьылларга ордон хаалбытым буолла. Хоргуйан саас бэс сутукатын хааһылаан сиирбитин өйдүүбүн. Ийэм колхозка ыанньыксыттыы сылдьан тымныйан сөтөл буолан өлбутэ. Убайбын уонна миигин Тойбохой детдомугар 1947 сыллаахха киллэрбиттэрэ. 1951 сыллаахха ремесленнай училещаҕа Хабаровскайга ыыппыттара. Барыта уон детдом оҕолоро этибит. Онтон Якутскайга кэлбиппитигэр, хойутаабыккыт диэннэр чугас Суотту детдомугар ыыппыттара. Ол сылдьан хараҕым трахомалаан Чурапчыга Дириҥ детдомугар атаарбыттара. Сэттэ кылааһы бүтэрбитим кэннэ Якутскайга профтехшколаҕа киирбитим. Ити курдук тулаайах оҕолору ханна мунна батар да ыытан испиттэрэ. 1956 сыллаахха армияҕа ыҥырбыттара: маҥнай Чита куоратыгар, салгыы Южнай Уралга Орск куоракка сулуспалаабытым, барыта үс сыл. Армия кэнниттэн ремесленнай училищеҕа үөрэнэн бүтэрбитим уонна Үөһээ Бүлүү промкомбинатыгар үлэлээбитим. Үлэлии сылдьан вечернэй оскуолаҕа 8, 9, 10 кылаастарга үөрэнэн бүтэрбитим. Онтон Московскай технологическай институтка киирэн үөрэнэн, 1969 сыллаахха бүтэрбитим. Саха сиригэр кэлэн мебельнай фабрикаҕа инженер- технологынан үлэлээбитим. Кэнники сылларга солбуйааччы директорынан снабженияҕа үлэлээбитим. 1992  сыллаахха пенсияҕа тахсыбытым. Бэйэм 8-с оҕолоохпун. Кэргэним 1993 сыллаахха оһолго суох буолбута. Биир тылынан эттэххэ тулаайах оҕо дьылҕатын барытын билбитим. Бэйэм олоххо кытаанах санаалаах буолан баччааҥҥа дылы тиийэн кэллэҕим. Кырдьар сааспар олох үтүөтүн биллим диэхпин баҕарабын. Билигин оҕолорбунаан куоракка 4 хостоох дьиэҕэ олоробун». Бу маннык буолар сэрии кэмин оҕотун дьылҕата.