Тыыл, үлэ ветерана

Александра Афанасьевна НИКОЛАЕВА.

1931 с. Нээлбиктэҕэ Афанасий Васильевич, Марина Дмитриевна Наумовтар дьиэ кэргэннэригэр төрөөбүт. Кини иннигэр оҕо турбат буолан, эрдэ кыыс оҕону иитэ ылбыттарын кэнниттэн кини төрөөбүт. Кэлин өссө балтыламмыттар эрээри, ол оҕо биэһигэр диэри хаампакка олорон төннүбүт. 1941 с. Марбаҕа 1-кы кылааска үөрэнэ киирбит, маҥнайгы учуутала Тарас Васильевич, наһаа үчүгэй учуутал этэ диэн ахтара. Кэлин Екатерина Васильевнаҕа үөрэнэ сылдьан 5-с кылаастан уурайбыт. Үөрэнэр кэмигэр интернакка олорбут, сайын аайы көлүүр оҕус сиэтэн үлэлиирэ, Леонтьев Бүөтүрдээххэ дьукаах олорон, оҕо көрөн, ынах хомуйан көмөлөһөр эбит.

1946 с. ийэтэ хаана баран өлбүтүн кэннэ, тулаайахсыйбыт кыргыттары икки аҥы дьон харайа ылбыттар: эдьиийин Даарыйа диэн иитэ ылбыт, оттон Александраны - Анисия Прокопьевна. Оскуоланы бүтэрэн баран Жданов колхозка араас үлэҕэ сылдьыбыт: ыанньыксыттаабыт, сороҕор субай көрбүт. Ити курдук 24 сыл устата сүөһү үлэтигэр сылдьан баран доруобуйатын туругунан оскуолаҕа дьиэ сууйааччынан үлэлээн пенсияҕа тахсыбыт.

Соҕотох кыыстаах, икки сиэннээх, хос сиэннээх.