Сэрии сылын оҕото, үлэ ветерана

Александра Петровна ПАВЛОВА туһунан

уола Ефремов Петр Семенович:

Биһиги ийэбит 1938 с. атырдьах ыйын20 күнүгэр Үөһээ Мэйик нэһилиэгэр төрөөбүтэ. Сэттис кылааһы Сунтаар оскуолатыгар бүтэрэн баран, 1954 с. Сунтаарга арыы собуотугар рабочайынан үлэтин саҕалаабыта. Үлэһит, кыһаллыгас кыыһы Дьокуускайга маастардары бэлэмниир кууруска үөрэттэрэ ыыппыттара. Үөрэҕин бүтэрэн 1956 с. саас, уу-хаар тахсан турар кэмигэр Марбаҕа үлэҕэ ананан, почта таһар атынан тахсыспыта . Онтон ыла илиитин араарабакка арыы собуотугар маастарынан 1996 с. диэри үлэлээбитэ.

Урут үлэлэрэ барыта илиинэн этэ. Кирпииччэ оһоҕу оттон, улахан уулаах баахха 40 киилэлээх үүттээх бидоннары уган сылыталлара, таһаартыыллара. Үүттэрин илиинэн сэппэрээтэринэн эрийэллэрэ. Тымныы подвалга арыыларын таһаллара. Хойут электричество киирэн үлэлэрэ арыый да чэпчээбитэ.

Ийэбит элбэх дьону кытта бииргэ үлэлээбитэ. Ол курдук Мария, Дмитрий Гурьевтар, Павлова Валентина Осиповна, Кондратьева Екатерина Дмитрьевна, Зайнуллина Мария Ивановна, Яковлев Мисаил Иванович, үүт тиэйэр массыына суоппардара Козлов Геннадий Евлампьевич, Евсеев Николай Павлович уо.д.а. Үлэлиир коллектива мэлдьи түмсүүлээх, эйэлээх буоларыгар кыһаллара. Ол да иһин кини салайар коллектива бэриллибит былааны толорон уонна аһары толорон мэлдьи үчүгэй үлэлээх арыы сыаҕынан биллэрэ. Арыы сыаҕар ийэбит 42 сыл тохтоло суох үлэлээбитэ. Үчүгэй үлэтин иһин элбэх наҕараадалардаах. Ол курдук 1967 с. коммунистическай үлэ ударнига, 1986 с. “Тыа хаһаайыстыбатын бастыҥ үлэһитэ”, 1982 с. “Эт-үүт промышленноһын социалистическай куоталаһыытын туйгуна” ааттары ылбыта, “Идэтигэр бастыҥ” диэн дипломунан наҕараадаламмыта.

Бордоҥҥо олоҕун аргыһын аҕабытын Данилов Семен Ефремовыһы көрсөн ыал буолан, сэттэ оҕону төрөтөн, көрөн-харайан, атахтарыгар туруортаабыта. Аҕабыт эрдэ өлөн аҥардас хаалан баран, санаатын күүһүнэн, урууларын, бар-дьонун өйөбүлүнэн биһигини улаатыннартаабыта. Билигин оҕолор бары үөрэнэн , үлэһит дьон буолан олоробут. Билигин 15 сиэн, 6 хос сиэннэрдээх. Биһиги ийэбитинэн киэн туттабыт уонна олохпутугар, үлэбитигэр мэлдьи холобур оҥостобут.