Никита Антонович  1907сыллаахха Арыылаахха төрөөбүтэ.

Сэрии кэмигэр Тойбохой оскуолатыгар учууталлыы сырыттаҕына армияҕа ыҥырыллыбыта. Забайкальскай фроҥҥа сэриилэспитэ. Японияны ылыы иһин мэтээллээх. Сэрииттэн кэлэн баран Тойбохойга, Туойдаахха, Тэҥкэҕэ учууталлаабыта.

Кэргэнэ Михайлова Агафья Афанасьевна. Кинилэр Юрий уонна Александра диэн оҕоломмуттара.

Алексеев Юрий  Никитич төрөөбүт сыла 1937.

Юрий Никитич кэргэнэ Шашкина Раиса Федоровна Рязанскай уобалас Ермишь бөһүөлэгэр олунньу 4 күнүгэр 1935 сыллаахха  төрөөбүт. Горьковскай медучилищены бүтэрэн баран, Саха сиригэр ананан Тэҥкэҕэ 1956 сыллаахха фельдшерынан үлэлии кэлбитэ.  Бу бириэмэҕэ киин сирдэртэн специалистары Саха сиригэр ыыталыыллара. Эдэркээн нуучча кыыһын Тэҥкэҕэ  биэлсэр Рая диэн ааттыыллара.

Юрий Никитич уонна Раиса Федоровна оҕолоро: 

Галина 1957 сыллаахха Марбаҕа, Анатолий 1959 сыллаахха Ермишькэ, Игорь 1960 сыллаахха Кэмпэндээйигэ төрөөбүттэр.

Кэлин Раиса Федоровна Бордоҥҥо, Кэмпэндээйигэ үлэлии сылдьыбыта. Онтон 1965 сыллаахха оҕолорун илдьэ дойдутугар төннүбүтэ.

Юрийдаах Рая оҕолоро үөрэнэн араас идэлээх үлэһиттэр буолбуттара.  Галина Юрьевна Мичуринскай тыа хаһаайыстыбатын техникума - агроном, Анатолий Юрьевич Ленинградскай училище – механик, Игорь Юрьевич Московскай уобалас Клин куорат Геологоразведочнай техникум – геолог буоланнар үлэлээн-хамсаан пенсияҕа таҕыстылар. Бары  кэргэннэнэн иккилии оҕолоохтор, сиэннэрдээхтэр. Анатолий Юрьевич ыалдьан 2004 сыллаахха суох буолбута. Галина билигин Московскай уобалас Ликино-Дулево куоракка, Игорь Юрьевич Хакасия Сорск куоратыгар  олороллор.

Борисова (Алексеева) Александра Никитична төрөөбүт сыла 1947.

Шура оскуоланы Тойбохойго бүтэрбитэ. Оскуолаҕа үөрэнэ сылдьан сытыы-хотуу, үчүгэйдик үөрэнэр кыыс этэ. Оскуола кэнниттэн эдэр ыччаттар Бэттиэмэ ферматыгар үлэлии тахсыбыттара. Шура эмиэ онно ыанньыксыттаабыта. Онтон үөрэххэ туттарса Москваҕа баран устунан Владимирскай уобаласка үлэлии хаалбыта.

Борисов Геннадий Алексадрович диэн нуучча киһитигэр кэргэн тахсан, Покров куоракка олохсуйан олорбута. Кэргэнинээн түөрт оҕоломмуттара: Светлана (1973с.т.), Никита(1979с.т.), Владимир(1985с.т.)   

Шура Покров куоракка өр кэмҥэ бытовой комбинакка иистэнньэҥинэн үлэлээн пенсияҕа тахсан олорор.

Онон Никита Антонович, Агафья Афанасьевна сыдьааннара салгыы үксүү, хаҥыы тураллар. 

Ахтыыны суруда кыыһа Алесандра Никитична

Ыам ыйын 3 кһнэ 2021с. Покров

Салгыы Галина Гаврильевна ахтыыта:

Алексеев Никита Антонович мин учууталым. Кини миигин сэрииттэн кэлэн баран Тойбохойго 5-с кылааска нуучча тылыгар үөрэппитэ.  Олус кыһаллыгас оҕону таба өйдүүр уонна өйдөтөр, ол эрээри олус холку учуутал этэ.  Оччолорго нуучча тылын үөрэтии ыарахан үлэ этэ, тоҕо диэтэххэ былыргы тыа сирин оҕолоро нуучча тылын олус ыараханнык ылыналлар. Тылларын саппааһа аҕыйах нууччалыы тылы истибэттэр, нууччалыы аахпаттар, кинигэ да суох, ол иһин тылга охсубутун (ударениетын) да сатаан туруорбаттар этиини оҥоруу навык суох, элбэх көлөһүҥҥүн тохтоххуна, нууччалыы кинигэни аахтардаххына, араас албаһы-ньыманы тутуннахха эрэ тугу эмит кылам гыннарыаҥ. Билиҥҥи курдук буолуо дуо. Холобур Мин үксүн текси нойосуус үөрэтэрим, нууччалыы билиэхпит наһаа баҕарар этим нууччалыы кинигэни өйдөөбөт эрээри мээнэ ааҕарым. Ол сылдьан хайдах эрэ быһа таайан дуу, хайдах дуу үгүс тылы бэйэм билэр буолан хаалбытым. Ону Никита Антонович 4 сыананы ардыгар 5-һи да туруоран дьоллуура. Уруокпутугар инспектор киирдэҕинэ булгуччу ыйытыллар этим. Устунан олох учууталабын олус таптаабытым уруога буоларын күүтэрим. Онтон кэлин Тэҥкэҕэ кэлэрбэр кини кулуупка сэбиэдиссэйинэн үлэлиир эбит, кини да мин да үөрэ көрсүспүппүт. Тэҥкэҕэ ыччат элбэх этэ олус көхтөөх этилэр. Кулууп үлэтэ, араас кэнсиэрэ, испэктээк, оһуокай субуота аайы буолара.