10:38 Алексеев Прокопий Спиридонович |
АЛЕКСЕЕВ Прокопий Спиридонович (1896-1979) Биһиги аҕабыт Алексеев Прокопий Спиридонович 1896 сыллаахха Ньурба улууһун Дьаархан нэһилиэгэр уон оҕолоох ыалга төрөөбүтэ. Алта уол уонна түөрт кыыс үһүлэр. Аҕабыт бииргэ төрөөбүттэр иэҕэллэр диэн бөдөҥ уҥуохтаах, күүстээх, сэмэй үлэһит дьон эбит. Аҕа дойду сэриитигэр биэс уол сэриигэ ыҥырыллыбыттар. Онтон үс уол сэрииттэн эргиллэн кэлбиттэр. Икки уол сэрии толоонугар охтубуттар. Сэрии кэнниттэн биһиги аҕабыт дойдутугар Ньурбаҕа эргиллэн кэлбит. Онтон үлэлии Бодойбоннон, Миирнэйинэн, Тэҥкэннэн сылдьыбыт. Амакинскай экспедицияҕа үлэлээбит. Кэнники Максимов Ыстапаан «Эһиги аҕаҕытынаан Мирнэйгэ алмаас хостооһунугар сылдьыбыппыт»- диэн кэпсиир этэ. Мас кэрдээһинигэр, шуурпа хаһааһыныгар үлэлээбиттэр. 1952 сыллаахха Мөлүдүөрэ диэн Мэхээйэлэптэр эбэлэрэ дуруускалаан биһиги ийэбитин Спиридонова Татьяна Михайловнаны кэргэн ылбыт. Аҕабыт 56-ҕар, ийэбит 33-гэр холбоспуттара. Түөрт оҕоломмуттара: үс кыыс, биир уол. Марбаҕа колхозка рабочайынан үлэлээбитэ. Тутууга эҥин сылдьыбыта. Аҕабыт биһиги оскуолаҕа үөрэнэрбитигэр соҕотоҕун бүтүн ферма сааҕын таһаарыытыгар үлэлээбитэ. Сарсыарда аҕыска барара. Киэһэ 7-8 диэки кэлэрэ. Онно күнүскү аһылыгын ферма ыалыгар ыһыктанан баран аһыыр этэ. Мэхээйэлэп Бүөтүрдээххэ, Попов Ньукулайдаахха, Уйбаныап Руслан дьонугар. Үлэтин бэлиэтигэр боростуой тэтэрээттээх, химическай харандаастаах этэ. Латинскай алфавитынан аатын суруйан баран тугу үлэлээбитин, үлэлээбит күнүн бэлиэтэнэн иһэрэ. Сайынын оҕонньоттору кытта (Ньукулаайап Аввакуумнааҕы, Бөтүрүөп Кирииллээҕи) тыаҕа күһүҥҥү дылы оттууллара. Судургу, мас хайдыбытын курдук көнө майгылааҕа. Туоха да албын- түөкүнү сөбүлээбэтэ. Биирдэ колхуостаах саһаан мас иэс ылбыт эбит. Ону төлөөрү саһаанныы биһигини илтэ. Илииннэн эрбээн, хайытан, саһаан туруорарбыт. Күлэ- күлэ саһааммытын ардьан гына туруорбуппутун көрөн баран кыһырда. Хос туруордахпыт дии. Кырдьан баран оҕонньоттору кытта эбиискэ аһылык бэлэмнээһинигэр үлэлиир этэ. Харыйаны, талаҕы кырбаталлара. Табаарыстара Кынат Дьөгүөр, Ньукулаайап Аввакуум, Ньарбыкыан оҕонньор дөрүн- дөрүн сылдьаллара. «Ньурба Бороккуоппайа» диэн аттыыллара. Улахан уҥуохтаах, уурталаан эдэргэ дылы киэҥник хардыылаан хаамар, улахан саҥалаах этэ. Эдэригэр күүстээх, үлэни- хамнаһы кыайыгас үһү дьон кэпсииринэн. Сэрии туһунан кэпсиирин сөбүлээбэт этэ. Ол саҕана иҥэн- тоҥон ыйыталаспат да суоҕа. Кэлин Бүлүү, Якутскай военокматыттан ыйыталаһа сатаабыппыт да эппиэт ылбатахпыт. Ньурбаттан ыйытык оҥорбуппутугар маннык сурук кэлбитэ: Алексеев Прокопий Спиридонович- 1896 г.р. призван 29.06.1944 года Нюрбинским РВК. Участник войны с фашистской Германией. Проходил службу в составе в/ч полевая почта 2846 18 Воздушная армия, рядовой стрелок, демобилизован 19.07.1945 года. Основание: книга памяти Нюрбинского улуса. Часть 1, страница 34. ВР и.о. военного комиссара Нюрбинского улуса РС (Я) ст. Лейтенант А.Азизов. Наҕараадалара биллибэт. Сэрииттэн борохуотунан кэлэн иһэн докумуонун эҥин ууга түһэрбит үһү. Аҕабыт 1979 сыллаахха ыалдьан өлбүтэ. Ийэлээх аҕабыт 21 сыл аһара иллээхтик олорбуттара. Бу кыайыы кэлэрин туһугар аҕабыт сыратын- сылбатын, доруобуйатын биэрбитэ. Кини олоҕун сиэннэрэ, хос сиэннэрэ салгыыллар. Ахтыыны суруйдулар кыргыттара: Елизавета, Елена, Евдокия Ыам ыйа 2015 сыл Дьокуускай куорат |
|
|
