Тыыл, үлэ ветераннара

Алексей Иванович, Варвара Егоровна АВИЯЛОВТАР

тустарынан ииппит кыыстара, педагогическай үлэ ветерана

Федотова Дора Егоровна:

Ииппит дьонум, үлэ, тыыл ветераннарын Авиялова Варвара Егоровна уонна Алексей Иванович тустарынан үтүө тылынан ахтан-санаан ааһыахпын баҕарабын. Сэрии сылларыгар эдэр комсомолка кыыс Варвара от тиэйиитин курдук араас ыарахан үлэҕэ сылдьыбыта. «Бурдук түүтэхтээһинигэр инникилэр ахсааннарыгар, мэлдьи хайҕалга сылдьарым» диэн кэпсиирэ. От мунньуутугар, бугулга эмиэ инники буолара, бэйэтэ активнай соҕус киһи этэ. Эдэригэр күүстээх үлэҕэ хоһууннук сылдьыбыта таайан, сааһыран баран ыарытыйар буолбута. Ол да гыннар таах олорботоҕо, ынах быатын хатан фермаҕа туттарара.

Алексей Ивановиһы сэриигэ сааһынан ыыппатахтар. Ол ыарахан кэмнэргэ Туруктанан атынан таһаҕас таһара. Онно араас эрэйи-моһолу көрсөрүм диэн кэпсиирэ. Эмиэ ол кэмнэртэн булдунан дьарыктанан бөһүөлэгин дьонун аһатара, улахан, кыра да булка барытыгар сылдьара. Кыыл-сүөл сылдьар орохторунан сохсо, хапкаан, туһах бөҕөнү иитэн киирэрин, дьахталлар кини оҥорон биэрбит салааскатынан тиэйэн хомуйан киллэрэн, астаан аһыыллар эбит. Уһанарынан дьарыктанара, хохуол оҕонньор диэн уус оҕонньордуун Сунтаарга урукку хирургическай балыыһа буолан турбут дьиэни туппуттар. Кэлин колхоз буолбутун кэннэ оттооһуҥҥа элбэхтик үлэлээбитэ. Үчүгэй үлэтин туоһулуур элбэх бочуотунай грамоталардаах, мэтээллэрдээх, Бочуот кинигэтигэр киирбитэ. Бэйэтэ төрөппүт оҕото да суоҕун иһин, оҕолору олус сөбүлүүрэ. Эһэбит диэн ааттыыллара, мэлдьи кэмпиэт кэһиилээх сылдьара, батыһыннара сылдьан «Ону-маны алдьаппат буолуҥ» диэн үөрэтэрэ.

Олус интеллигентнай, политиканы хасыһан билэр, ырытар дьоҕурдаах, көнө майгылаах, амарах дууһалаах, ураты чиэһинэй киһи этэ. Үлүгэрдээх хаһыаты, сурунаалы суруйтарара, саамай сөбүлүүр хаһыата «Кыым», сурунаала «Огонек» этэ. Радионы көтүппэккэ истэрэ уонна ону барытын биһиэхэ кэпсиирин сөбүлээн истэрбит. Оҕолор үөрэхтээх буолуохтарын баҕарара, тулаайахтары олус аһынара. Мин билэрбинэн Черепанов Алексей Михайлович учууталы бэйэтэ үбүлээн үөрэттэрбитэ.

Дьонум барахсаттар 30 сыл олус иллээхтик-эйэлээхтик бииргэ олорбуттара. Миигин 4-5 сааспар тулаайах хаалбыт кыыһы бэйэлэрин төрөппүт оҕолорун курдук иитэн, үөрэттэрэн, ыал оҥорон баччаҕа тиийэн бэйэм эбэ буолан олордоҕум. Кинилэргэ олоҕум тухары махталым муҥура суох.