13:06 Андреев Анатолий Прокопьевич |
АНДРЕЕВ Анатолий Прокопьевич(1919-2012)Мин аҕам, Андреев Анатолий Прокопьевич 1919 сыллаахха Сунтаар улууһугар Бордоҥ нэһилиэгэр Куруҥ Балаҕан түбэтин Тыымпы диэн сиргэ олорор колхозтаах дьиэ кэргэҥҥэ төрөөбүтэ. «Каганович» аатынан колхоз чилиэнэ Борукуопай оҕонньор колхозка фермаҕа үлэлиирэ. Дьиэлэрэ Тыымпы арҕаа төбөтүгэр баар өтөххө баар эбит. Кэлин ол өтөҕу Борукуопай буолата диэн ааттыыллар. Кэргэнинээн элбэх оҕону төрөппүттэр эрээри икки уол эрэ тыыннаах ордубуттар. Аҕам убайа Иван Прокопьевич 1916 сыллаахха төрөөбүт. Онтон түөрт сыл буолан баран мин аҕам төрүүр. Борукуопай аймахтара чугас Ейөҥөй диэн сиргэ олорбуттар эбит. Тихонов Егор Федотович дьонноро. Улгумдаҕа Каганович колхоз киинэ эбит, онно Ирина Афанасьевна диэн аҕам аҕатын бииргэ төрөөбүт балта олорбут. Кыыһа Федотова Дора Егоровна Бордоҥҥо олорор. Тыымпыга уонна Ньыла5а «Каганович» колхоз фермалара бааллар эбит. Онон мин аҕам аах ферма араас үлэтигэр сайынын окко эриллэн- мускуллан үлэлээн улааппыттар. Аҕам 1929 сыллаахха оскуолаҕа үөрэнэ киирбит. Убайа Иван икки кылааһы бүтэрэн баран колхозка үлэлии тахсыбыт. Мин аҕам түөрт кылааһы бүтэриэр дылы Улгумдаттан Марбаҕа диэри түөрт биэрэстэни хааман үөрэммит. 1932 сыллаахха 4 кылааһы ситиһиилээхтик бүтэрбит. Онон аҕам Дагдаалар аймахтарыгар саамай үөрэхтээх уолларынан аатырбыт. Дагдаалар диэн аҕам төрүттэрин сахалыы ааттара этэ. Түөрт кылааһы бүтэрэн дьонугар Куруҥ Балаҕаҥҥа сырыттаҕына, Тэҥкэҕэ суруксуттата диэн Кынаачай учуутал этиититинэн үлэлии барбыт. Төһө өр үлэлээбитин билбэтим. Каганович колхозка эмиэ суруксуттаабыта. Жданов колхозка эмиэ суруксутунан онтон суотчутунан улэлии сылдьыбыт. «Красный большевик» колхозка улэлии сырыттаҕына Мартынов Петр Капитонович Киров колхуоһугар эмиэ документ толорооһунугар ыҥыран үлэлэтэ сылдьыбыт эбит. 1941 сылллаахха сэрии саҕаланыытыгар бастакы хомуурга ыҥырыллан сэриигэ аттаммыт. Сэриигэ бастаан Иркутскайга сбордаммыттар. Онно Докторов Егор Саввичтыын бастакы өттүгэр бииргэ сылдьыбыттар. Онтон 76 мотострелковай полкаҕа сулууспалаабыт. Өстөөҕү утары атын Советскай саллааттары кытта кыырыктаах сэриигэ киирсибитэ. «За Победу над Германией» мэтээлинэн наҕараадаламмыт. 1946 сыл от ыйын 1 күнүгэр дойдутугар эргиллэн кэлбит.
Оттон убайа 1942 сыллааха ыҥырыллыбыт. Сулууспалыы сылдьан 09.03.1943 кыргыһыы толоонугар охтубута. Волгоградскай уобаласка Прямая Балка диэн дэриэбинэҕэ көмүллэ сытар. Аҕам сэрииттэн кэлэн баран Сунтаардааҕы кэмбинээккэ үлэлии киирбит танас тигээччиннэн, эр киьи, дьахтар да кэтэр көстүүмнэрин тигээччинэн Фан Мариналыын, Фан Владимир Зиминович дьиэтигэр үлэлээбиттэр. Онтон 1953 сыллаахха Бордоҥҥо тахсыбыт. Улгумдаҕа эдьиийин кыыһыгар Дора Егоровнаҕа куруук сылдьар эбит. Дора эмиэ олох кыратыгар тулаайах хаалбыт. Онон хардарыта көмөлөсүһэллэрэ. Ол сылдьан 1953 сыллаахха мин ийэбин кытта билсибит. 1955 сыллаахха мин баар буолбутум. Мин төрүөм иннинэ 1954 сыллаахха Туруктаҕа Туой-хайа табаһыттарын кытта Ленскэйгэ баран леспромхозка улэҕэ киирбит онно рабочай таҥас тигэр иистэнэр мастерскойга үлэлээбит. Ленскэйгэ Мартынова Анастасия диэн бордоҥтон төрүттээх, эбэм тастыҥ балтын кэргэн ылбыта. Нүүйэҕэ тахсан олорбуттар, онно лесхоһунан үлэлээбитэ.
Ахтыыны суруйда уола Федоров Владимир Анатольевич 13.04.2015с
|
|
|
