Үлэ, тыыл ветерана

Анисия Прокопьевна ПАВЛОВА.

Кини 1924с Тэҥкэҕэ төрөөбүтэ. Ийэтэ эрдэ өлөн, тулаайах хаалан оскуолаҕа ситэ үөрэммэтэҕэ. Кылгас да кэмҥэ үөрэннэр, олус кыһаллар эбит, ордук ахсаан, история уруоктарын "наһаа ыпсаран, интэриэһинэйдик кэпсиир этэ” диэн бииргэ үөрэммит табаарыстара кэпсииллэр. Оччотооҕу оҕо сиэринэн үлэлээбит. Сытыы-хотуу, үчүгэй тыллаах-өстөөх кыыһы таба көрөн салайар үлэҕэ тардан барбыттар. Ол курдук 1946 с Бордоҥ нэһилиэгэр ааҕар балаҕан сэбиэдиссэйинэн анаабыттар. Сэрии бүтэн дьон-сэргэ олоххо, билиигэ тардыһыыта улаатан испитэ. Анисия Прокопьевна нэһилиэнньэни мунньан сурунаал, хаһыат ааҕар, араас бэсиэдэлэрин оҥорор эбит. салгыы 1948 с. Бордоҥ нэһилиэгин сэбиэтин председателинэн үлэлээбитэ. Икки сыл үлэлээбитин кэннэ тэрийэр, салайар дьоҕурдаах эдэр кыыһы Дьокуускайдааҕы колхоз председателлэрин бэлэмниир тыа хаһаайыстыбатын оскуолатыгар үөрэххэ ыыппыттара. Билиигэ-көрүүгэ тардыһыылаах эдэр салайааччы Анисия Прокопьевна элбэх ыччаты кытта алтыһан үөрэммитин, сайдыбытын, Дьокуускайга үөрэммит үс сылын олоҕун саамай үтүө кэмнэринэн ааҕар этэ. Агроном идэлээх, дипломнаах төрөөбүт нэһилиэгэр кэлэн Жданов колхоз солбуйааччы председателинэн 1959 с. диэри үлэлээбитэ. Оччотооҕу кэмҥэ партия сорудаҕынан ханна ананныҥ да үлэлии баран иһэҕин. Ол кытаанах ирдэбил этэ. 1959 с. Анисия Прокопьевна Бүлүүчээн нэһилиэгин Карл Маркс аатынан колхозка биригэдьииринэн ананан барбыта, колхоз эти-үүтү оҥорууга үрдүк ситиһиилэригэр сэмэй кылаатын киллэрсибитэ.

Онтон салгыы Жданов колхоз Хаданнааҕы учаастагар биригэдьииринэн, Хадан нэһилиэгин исполкомун председателинэн, атыыһытынан үлэлээбитэ. 1967 с. "Сунтаар” совхоз бастайааннай рабочайынан пенсияҕа тахсыар диэри үлэлээбитэ. "Бордоҥ” совхоз республикаҕа аатыра сылдьыбыт "Маяк” ферматыгар, оҕуруот аһын үүннэрэр «Кочан» үлэ-сынньалаҥ лааҕырыгар хас да сыл наставниктаабыта.

Анисия Прокопьевна комсомол, партия эрэллээх байыаһа этэ. 1943 с. комсомол чилиэнэ буолбута, 1949 с. партия кэккэтигэр киирбитэ. Үлэҕэ үрдүк ситиһиилэрин, олоххо актыыбынай позициялаах 8лэ ветерана кыайыы 30 сылыгар уонна «Маршал Жуков» 8б8л86йдээх мэтээллэринэн на5араадаламмыта.

Төрөөбүт нэһилиэгэ, колхоһа, совхоһа сайдарыгар-үүнэригэр, олохтоохторо байылыат олохтоох, ыччаттара үлэҕэ бэриниилээх, үчүгэй өйдөөх-санаалаах буолалларын туһугар Анисия Прокопьевна туох баар сатабылын, өйүн-санаатын ууран 45 сыл үлэлээн баран 1991 с. пенсияҕа тахсыбыта. Кини сүрдээх элбэх сэһэннээх буолара. Былыргы төрүттэрин-уустарын, нэһилиэк кырдьаҕастарын, урукку үлэ, олох-дьаһах туһунан бараммат элбэх кэпсээннээҕэ.

Эдэр сааһыттан өр сылларга бииргэ үлэлээбитэ үтүө-мааны дьоннорун тустарынан мэлдьи истиҥник ахтара. Биригэдьиирдэр Никифоров Егор Евсеевич, Егоров Семен, Алексеев Иннокентий Григорьевич, Михайлов Степан Алексеевич колхоз председателлэрэ, дириэктэрдэрэ Герасимов Прокопий Меркурьевич, Попов Степан Спиридонович, Семенов Семен Афанасьевич, Осипов Николай Дмитриевич, Степанов Петр Николаевич, партком секретара Афанасьев Семен Васильевич, сэбиэт председателлэрэ Алексеева Татьяна Ильинична, Петров Лука Васильевич, колхозка, совхозка элбэх үтүөлээх-өҥөлөөх үлэһиттэр Павлова С.И., Федорова Мотрена Николаевна, Леонтьев Петр Егорович, Иванов Николай Егорович, Николаев Аввакум, Леонтьева Ирина онтон да атын элбэх ахсааннаах үлэһиттэр тустарынан оскуолаҕа кэлэн кылаастары кытта көрсүһүүлэргэ кэпсиир буолара. «Кырдьаҕас көлүөнэ үлэһиттэр олорон ааспыт олохторун, үлэлэрин убаастааҥ, сыаналааҥ, үөрэхтээх, үчүгэй дьон буолуҥ» диэн куруук этэ