Тыыл, үлэ ветерана

Анна Петровна КРАСКОВА туһунан

оҕолоро кэпсииллэр:

Биhиги ийэбит 1926 с. Куокуну нэhилиэгэр төрөөбүтэ. Ийэтэ, аҕата эрдэ суох буоланнар, олох кыра эрдэҕиттэн тулаайах хаалан алта сааhыгар диэри эhэтигэр иитиллибит. Онтон аймахтара Тойбохойго ылбыттар. Эдьиийэ Дарья Бордоҥ киhитигэр кэргэн тахсыбытыгар кинини кытта кэлсибит. Сэрии ыар сылларыгар тыыл ыарахан үлэтигэр эриллибит, аччыктааhын, тоҥуу-хатыы ыарын этинэн-хаанынан билбит. Туох баар кыайар-кыайбат үлэтигэр, ханна баран үлэлээ диэбит сирдэригэр барытыгар үлэлээбит. Эдэр кыыhы ыраах сирдэргэ оттото, сүөһү көрдөрө кытта ыыталлара. Кыhыл обуоска киирэн Ленскэйгэ баран кэлбитин, мас кэрдиитигэр сылдьыбытын, айаас аты биэрэннэр өлө сыспытын биирдэ эмит дьүөгэлэрин кытта ахтан ылара. Анна Петровна сэрии сылларыгар бэйэни харыстаммат үлэтэ сыаналанан, 1946 с. «1941-1945 сс. Аҕа дойду улуу сэриитин кэмигэр килбиэннээх үлэ иhин» мэтээлинэн наҕараадаламмыта. Ол Сталин төбөлөөх мэтээлин оҕо сылдьан оонньуу сылдьан сүтэрэн кэбиспиппит. Сэрии кэнниттэн араас үлэлэргэ үлэлээбит.

1950 с. аҕабытын, сэрии кыттылааҕын Егоров Егор Васильевиһы көрсөн, икки тулаайах дьон ыал буолбуттара. Ол эрээри дьоллоох олохторо уhаабатаҕа. 1957 с. аҕабыт сэриигэ ылбыт баастарыттан суох буолбута. Ийэбит түөрт ыы-кырбас кыра оҕолорун кытта соҕотоҕун туран хаалбыта. Улахана биэстээх, кырата үс ыйдаах. Биһигини харайарга, уопсайынан олоххо тулуурдаах, дьулуурдаах, тирэхтээх буоларга эдьиийэ Дарья көмөтө, өйөбүлэ улахан. Ийэбит сибиинньэ ферматыгар үлэлии сылдьан улахан остуол чаhытынан бириэмийэлэммитэ. Ол чаhы хойукка диэри сулууспалаабыта. Кэлин доруобуйата айгыраан 1964 с. детсадка көһөн пенсияҕа тахсыар диэри үтүө суобастаахтык үлэлээбитэ. Бэйэтин туhунан кэпсээбэт буолара. Көнө, сымнаҕас, аhыныгас майгылааҕа, кыраттан да олус үөрэрэ, ыалдьытымсах этэ. Киирбити наар чэйдэтэн ыытара. Хойут «Аана чаанньыгын тута сылдьар этэ» диэн ахталлара, суохтууллара. Кини хаhан да сылайдым-элэйдим, ыарыйдым диирин истибэтэхпит, күнү быһа тииҥ курдук үлэлээн түбүгүрэн тахсара. Биhигини барыбытын эдьиийиниин үөрэхтээх, үлэhит оҥортообуттара, сиэннэрин көрсүбүттэрэ, улаатыннарбыттара. Ийэбит 1998 с. бу олохтон туораабыта.

Улахан уола Егоров Егор Егорович Красноярскайдааҕы государственнай университеты бүтэрбитэ, физико-математическай наука кандидата. Бастаан политехническай институкка преподавателинэн, онтон өр сылларга Красноярскайдааҕы гидротехника научнай-чинчийэр институкка, кэлин Красноярскайдааҕы ГЭС-кэ инженерынан, отдел начальнигынан үлэлээбитэ. Билигин бочуоттаах сынньалаҥҥа олорор, энергетика ветерана.

Кыра уол Егоров Николай Егорович СГУ физико-математическай факультетын бүтэрбитэ, наука кандидата, доцент, РФ наукатын уонна техникатын бочуоттаах үлэһитэ. Билигин хотугу сир региональнай экономикатын институтугар үлэлиир, биэс оҕолоох, биэс сиэннээх.

Улахан кыыс Спиридонова Елена Егоровна СГУ омук тылын факультетын бүтэрбитэ, идэтинэн үлэлии сылдьан доруобуйата мөлтөөн олорор. Кини түөрт оҕолоох, түөрт сиэннээх.

Кыра кыыс Егорова Елизавета Егоровна Кемеровотааҕы медицинский институту бутэрэн, врач-стоматолог идэлээх. Өр кэмҥэ Сунтаардааҕы киин балыыhаҕа стоматолог бырааhынан үлэлээбитэ. Билигин Дьокуускайга республикатааҕы медицинскэй информационнай-аналитическай кииҥҥэ статистик-быраас. РФ, СР доруобуйа харыстабылын туйгуна, биир кыыс оҕолоох, сиэннээх.