Аввакумова (Яковлева) Варваря Михайловна

(От ыйын 1 кунэ 1930 сыллаах)

 Биһиги эбээбит Варвара Михайловна ийэтэ Пелагея Ивановна билиҥҥитэ Куокуну нэһилиэгин өрүс уҥуор Быйакы сиригэр төрөөбүт. Аҕата Мэхээлэ Тэҥкэ Саҥа Күөл түбэтиттэн Бүтэйтэн төрүттээх. Дьиҥэ элбэх оҕолоох эбиттэр дьонум, ол гынан баран ыалдьан өлбүттэр. Инньэ гынан бырааппынаан Бүөтүрдүүн ордон хаалбыппыт. Быраатым 4 кылааска дылы ыалга олорон үөрэммит. Кэлин улаатан баран хаартыскаҕа түһэрэр буолбута. Бордоҥунан, Сунтаарынан, Тойбохойунан сылдьан ыаллары, үлэлии сылдьар дьону түһэрэн дьоҥҥо биэртэлиир үһү. Кэлин ыалдьан бу орто дойдуттан барбыт. Урут дьоно кыра эрдэхтэринэ Бүтэйгэ киһи сиир бурдугун ыһан, үүннэрэн суоруналаан килиэп оҥостон сииллэр. Түүтэхтээн баран мууска эбэтэр кэлии курдукка бурдугун охсон ылан улахан лиискэ ууран хатараллар эбит. Ол хаппытын кэннэ аҕам оһох кэннигэр олорон суоруналыыра. Колхуоска оттуур, кыһынын бултуур этэ. Ийэм дояркалаабыта. Дьэрбэҕэ олорон кыһын көһөн киирэн иһэн миигин Сиэл ыйаабыкка төрөөбүтэ. Онтон Тэҥкэҕэ ыалга түспүт үһүбүт. Ол кэнниттэн күн бүгүнүгэр дылы 92 сааһыгар үктэнэн, Тэҥкэттэн харыс да халбарыйбакка икки уол сиэннээх уонна биир хос уол сиэннэнэн дьоллонон олорор.

 Оскуолаҕа бастакы кылааска үөрэнэ киирбитим. Ыраахтан Бүтэйтэн үөрэнэ сатаан баран уурайбытым. Онно кинилэргэ кэлэн Дмитрий Спиридонович Федоров оскуолаҕа төттөрү ыҥыра сатаабытын барбатахпын. Ол иһин кинигэ аҕалан биэрэр эбит. Маны көр диэн ойуулаах кинигэни биэрэр. Бырааһынньыктарга дьонун кытта кэлсэн оскуолаҕа киирэн кинигэ көрөн интэриэһиргээн арыт хоно хаалар эбит. Сарсыныгар дьонугар кэпсээн буолан тиийэн тугу билбитин, көрбүтүн кэпсиир. Ол да буоллар дьиэтэ ырааҕыттан соннук үөрэммэтэх. Күһүн оскуола оҕолоро Дмитрий Спиридоновичтыын кинилэр тастарыгар үөрэнээччилэри илдьэ сылдьан отоннууллар, онно ийэбитин эмиэ илдьэ сылдьар эбит.

 Кинилэр тастарыгар биир тимир ууһа Лаппайаан диэн киһи олорбут. Ийэбитигэр хомус оҥорон бэлэхтээбит. Кыһын буолла да, кинилэргэ кыстыыр. Биир кыыс оҕолооох эбит. Кинилэртэн чугас Мөлбүөт диэн сиргэ Молоһуок диэн күүстээх киһи олорбута диэн кэпсиир.

 Эбээбит оҕо сааһыттан колхозка, совхозка пенсияҕа тахсыар дылы дояркалаабыт. Үлэ, тыыл бэтэрээнэ. Үчүгэй үлэтин иһин колхоз, совхоз, улуус бочуотунай грамоталарынан уонна юбилейнай мэтээллэринэн наҕараадаламмыта.

Ахтыыны бэйэтин кэпсээниттэн суруйда,

 Валентина Дмитриевна Яковлева.

Муус устар 20 күнэ 2022 сыл. Тэҥкэ нэһилиэгэ.