Тыыл,үлэ ветерана

Дария Егоровна____________туһунан

сиэн быраата Петров Владимир Николоаевич-Бордоҥ Болуодьата:

Мин ийэм Ульяна Егоровна бииргэ төрөөбүт эдьиийэ Дария Егоровна Бордоҥ нэһилиэгэр Үҥкүр (Үүттээх) Күөл диэн сиргэ Кэрэмэс аҕатын ууһугар төрөөбүт. Кини сэрии иннинэ Сунтаарга Игнатий (Эбиэн) диэн үс уоллаах огдообо киһиэхэ кэргэн тахсан барбыт. Кэлин киниттэн икки уолу – Егоры уонна Рюригы төрөппүт. Эбиэн оҕонньор райпотребсоюзка ыскылаат сэбиэдиссэйинэн үлэлээбит, урут көмүс тутар лааппылаах эбитэ үһү, кини сэрии сылларыгар өлбүт.

• Даарыйа ииппит улахан уола Федор Игнатьевич Попов Япония сэриитигэр кыттыбыта, сэрииттэн кэлэн баран үөрэҕин салҕаан, Сунтаар орто оскуолатын 1952 с. аан бастакынан кыһыл көмүс мэтээлинэн бүтэрбитэ. Москваҕа И.В. Сталин аатынан геологическай институту бүтэрэн, биллиилээх геолог буолбута. Иккис уол Елисей Попов эмиэ Москваҕа топограф үрдүк үөрэҕин бүтэрбитин кэннэ КГБ-га үлэҕэ ылбыттар. 1962 с. Персидскай Заливка Америка, Куба, Советскай союз айдааннарыгар сылдьыбыт. Бу киһи кистэлэҥ байыаннай үлэҕэ үлэлээбит буолан, дойдутугар кэлбэтэх, сибээһэ суох. Убайа Федор Игнатьевич ирдэһэ, көрдүү сатаабыта. Арай биирдэ эрэ Оборона министерствотыттан “Бырааккынан киэн тутун, генерал-лейтенант байыаннай званиелааах” диэн кылгас биллэрии, эппиэт кэлбит уонна күн бүгүнүгэр диэри кини туһунан сибидиэнньэ суох. Кыралара Семен Игнатьевич Бүлүүгэ олорбут, кэргэннээх, оҕолордоох дииллэрэ. Эдьиийбит Даарыйа икки уолуттан улахана Егор Игнатьевич оскуоланы бүтэрээт, Сунтаар 1-кы №-дээх оскуолатыгар физика учууталынан үлэлээбит, улахан талааннаах учуутал, наһаа үчүгэйдик үөрэтэрэ диэн үөрэнээччилэрэ ахталлар. Оттон Рюрик Игнатьевич тутааччы идэлээх этэ, быйыл 74 сааһыгар ыалдьан суох буолбута, 2 уоллаах, 2 кыыстаах, элбэх сиэннэрдээх.

Убайым Виктор, эдьиийим Дора кинилэргэ олорон оскуоланы Сунтаарга бүтэрбитттэрэ. Эдьиийбит Даарыйа сытыары-сымнаҕас майгылаах, ааттаах асчыт, иистэнньэҥ бэрдэ, сахалыы мындыр толкуйдаах буолан, ити курдук соҕототоҕун биэс эр бэрдэ уолаттары киһи-хара оҥортообута. Тыа боростуой, үөрэҕэ суох дьахтара чэпчэкитэ суох олоҕу олорон ааспыта. Кини элбэх сиэннэрэ, хос сиэннэрэ удьуор утумун салгыыллар.