Тыыл, үлэ ветераннара Дмитрий Михайлович, Вера Иннокентьевна ЧЕРЕПАНОВТАР

Биһиги төрөппүттэрбит иккиэн 1934 сыллаахха Сунтаар улууһун, Бордоҥ нэһилиэгэр төрөөбүттэрэ. Иккиэн Бордоҥ нэһилиэгин, Марба оскуолатыгар үөрэммиттэрэ. Ийэбит оскуола кэнниттэн холкуоска ыанньыксыттаабыта, атын араас үлэҕэ эмиэ сылдьыбыта. Ол кэннэ Бордоҥ детсадыгар ньээҥкэнэн, балыыһаҕа кочегарынан, маҕаһыыҥҥа рабочайынан пенсияҕа тахсыар диэри үтүө суобастаахтык үлэлээбитэ. Аҕабыт, оскуола кэнниттэн армияҕа сулууспалаан баран, холкуоска, совхозка үйэтин тухары суоппарынан үлэлээбитэ. Өр сыллаах үлэтин иһин «Аварията суох үлэтин иһин» диэн бочуоттаах бэлиэлээх. Холкуос, совхоз үгүс массыынатын базалартан, собуоттаан перегоннаан элбэх хайҕалы ылбыта. Биһиги төрөппүттэрбит биэс оҕону төрөтөн, ыал-күүс гынан олох суолугартаһаарбыттара, уонтан тахса сиэннээхтэрэ. Дьоммут үтүө санаалаах, аһыныгас, аламаҕай дууһалаахтара, кыаммат хоппот дьоҥҥо көмөлөһөллөрө, хас да кырдьаҕаһы көрөн олорбуттара. Ийэбит 2007 сыллаахха, аҕабыт 1996 сыллаахха уһун, ыарахан ыарыыттан бу олохтон букатыннаахтык барбыттара.

Уола Петр Дмитрьевич, балтылара Дора Егоровна Федотова