ДОКТОРОВ Егор Саввич

(1922-1999)

Наҕараадалара: «Килбиэннээх үлэтин иһин», «ССРС Сэбилэниилээх Күүстэрин 50 сыла», «Кыайыы 25 лет сыла» мэтээллэр.

1922 с. Бордоҥ нэһилиэгэр Онтоһуук (билигин Сааба өтөҕө) диэн кэрэ айылҕалаах, өлгөм үүнүүлээх ходуһалаах, оччотооҕута баай бултаах-алтаах сиргэ төрөөбүтэ. 1934 с. Бордоҥ начальнай оскуолатыгар 3-с кылааһы бүтэрэн баран, аҕата өлөн, бэйэтэ ыалдьан салгыы үөрэммэтэх. 1938 с. Уйалаахха кииннэнэн тэриллибит Строд аатынан колхозка чилиэнинэн киирбит уонна биригэдьииргэ көмөлөһөр учуотчук буолбут. Онтон хас да сыл фермаҕа биригэдьиирдээбит.

Егор Саввич маҥнай 1942 с. армияҕа ыҥырыллар бэбиэскэни тутан, Сунтаарга киирэн 3 хоммутун кэннэ, 134-с ыстатыйанан төттөрү дойдутугар тахсыбыт. 1943 с. от ыйыгар иккиһин ыҥырыллан, Сунтаартан Усть-Кукка диэри борохуотунан, онтон массыынанан, тимир суолунан айаннаан Иркутскайга тиийбиттэр. Күһүн Монгольскай Народнай Республика илин кыраныыссатыгар Улан-Цирин диэн станцияҕа баар байыаннай чааска тиэрдибиттэр. Онно биир сыл сулууспалаабытын кэнниттэн дойдутугар уоппускаҕа ыыппыттар, дьиэтигэр 1945 с. кулун тутарга тиийэн кэлбитэ. Уоппускаҕа сылдьар кэмигэр Кыһыл армия фашистскай халабырдьыттары букатыннаахтык кыайбыта, саллаат уоппуската бүтэн сулууспалаабыт чааһыгар төннөөрү Сунтаарга киирбитин тохтотон «колхозкар тахсан биригэдьиирдээ» диэн төттөрү ыыппыттара. Тутатына хонуу биригэдьииринэн ананан үлэлээн барбыт.

Кини кэлин Күүкэйгэ колхоз председателинэн, Бордоҥҥо сэбиэт председателинэн үлэлээбитэ. Совхоз тэриллибитин кэннэ өр сылларга үтүө суобастаахтык суоппарынан үлэлээбитэ. 1977 с. пенсияҕа тахсан баран оскуолаҕа хачыгаардаабыта.

Егор Саввич 1955 с. Мария Архиповналыын ыал буолан биир кыыс оҕоломмуттара. Кыыстара Хабаровскайга медицинскэй институту бүтэрэн, оҕо бырааһын идэтин ылан, билигин Горнай Алтайга үлэлии сылдьар. Сиэннэрэ саха саллаата эһэлэринэн киэн тутталлар.