ДОКТОРОВ Петр Захарович

(1906-1987)

1942 с. Государственнай Оборона комитетын быһаарыытынан Фербенкс (Аляска) куораттан Чукотканан, Саха сиринэн Красноярскайга американскай бойобуой самолеттары аҕалар «Сталинскай трасса» диэн ааттаммыт саҥа салгын трассата аһыллыбыта. Дьокуускай куорат перегоночнай трасса киининэн буолбута.

Бастакы нүөмэрдээх перегоночнай авиадивизия штаба уонна салгын трассатын управлениета Дьокуускайга олохсуйан үлэлээбитэ. Онон сибээстээн Дьокуускай авиапордугар Америка самолеттара заправкаланан ааһалларыгар анаан элбэх тутуу үлэтэ барбыта. Үлэһиттэр олорор дьиэлэрин, ыскылааттары тутуу, порду бетоннааһын үлэлэрэ элбэх үлэһит илиигэ наадыйара. Ол иһин 1942 с. сэриигэ ыҥырыллыбыт дьонтон тутуу үлэтигэр дьоҕурдаахтары талан Дьокуускайга порт тутуутугар хаалларбыттара. Бу үлэ фронугар хабыллыбыт дьон ортотугар Бордоҥтон Докторов Петр Захарович, Григорьев Егор Егорович бааллара. Кинилэр хас да сыл устатыгар икки хараҥаны ыпсаран, күүстэрин харыстаабакка үлэлээннэр, стратегическай объекка араас тутууну ыытарга күүс-көмө буолбуттара.

Сэрии бириэмэтигэр Советскай Союз Америкаттан 14126 бойобуой самолеттары ылбыта. Олортон 8074 самолет «Аляска-Сибирь» диэн Саха сирин трассатын аҕалыллыбыттара уонна сидьиҥ өстөөҕү кыргарга сүдү күүс буолбуттара.

Биһиги биир дойдулаахтарбыт Григорьев Егор Егорович, Докторов Петр Захарович үлэ фронугар сылдьан харыларын күүһүнэн күүрээннээхтик үлэлээн улуу кыайыыны уһансыбыттара. ол иһин кинилэр ыччаттара уонна биир дойдулаахтара кинилэринэн киэн туттуохтарын тутталлар.