Егор Федотович НИКИТИН

Ийэм кэпсииринэн Дьөгүөр аһара булчут,  элбэх саҥалаах киирбит-тахсыбыт киһи үһү. Ааҕар балаҕаҥҥа үлэлэспит, дьону ааҕарга үөрэтиһэ сылдьыбыт.
Балтынаан Маарыйалыын чугас эркин бултка бииргэ сыдьаллара. Оччотооҕу дьон сиэринэн бултаан, балыктаан, оттоон, мас мастаан үлэлээн-хамнаан олорбут. Маска  киһиттэн син ойуччу соҕус талааннаах, ону-маны уһанара үһү. Оннооҕор иэйиитэ киирдэҕинэ, үүнэн турар маска быһаҕынан, сүгэннэн туттан киһи сирэйин оҥорон кэбиһэрэ үһү. Хаһан да сылайдым, утуктаатым, утаттым диэн олорбото үһү. Туох да үлэ буоллун, өрө сүүрэ сылдьан кыахтаахтык туттан-хаптан үлэлиирин, билэр дьоно ахтан ааһаллара. Сэриигэ иккис хомуурга барбыт. Ол сыл сэриигэ барыан иннинэ "булт түбэспэт, тайах суолбун туоруур буолла, сэрииттэн эргиллэр биллибэт” диэн балтыгар Маарыйаҕа эрэ эппит.
Сэриигэ дьону атаарар мучумааннара буолбут. Онно "чэ-чэ аһара тутумаҥ-хабымаҥ, сэрии бүтэн хаалыа, мин түргэнник бардахпыта сатанар” диэн таһырдьа ыстанан тахса охсубут уонна сулбу-халбы туттан күүтэн турар дьоҥҥо бара турбута диэн, ийэм кэпсиирэ. Сэриигэ сылдьан сурук суруйан дьонугар хаста да ыыппыт. Ол суруктары ийэм этэринэн, музейга диэн хомуйан ылбыттар.
Дьөгүөр сэриигэ барыан иннинэ кэргэннэммит. Ол кэргэнэ туспа Хадан диэки олорор. Кини сэриигэ барбытын кэннэ дуу, уол оҕоломмут. Уола Никитин Николай Егорович Ньурбаҕа кэргэннээх оҕолордоох олорор.
Ийэм убайа Егор Никитин Ильмень күөл кыргыһыытыгар Ийэ дойдутун көмүскүү сылдьан кулун тутар 6 күнүгэр 1943 сыллаахха геройдуу өллө диэн хара сурук туппуттар. 
 Маннык сиргэ көмүллэ сытар: Ленинградскай уобалас, Старорусскай район,  Взвадскай с/с, Взвад дэриэбинэ.

Ахтыыны оҥордо Индеев Александр Николаевич