Егор  Филиппович СТЕПАНОВ

(1927 - 2016)

Үлэ бэтэрээнэ

      Степанов  Егор  Филиппович,  1927  сыллаахха  Тэҥкэҕэ  элбэх  оҕолоох дьиэ  кэргэҥҥэ төрөөбүтэ,  тыыл бэтэрээнэ. Кыратыгар иринньэх оҕо этэ. Оҕо сааһын билбэтэх, сэрии кэмин оҕолоро күүстэрэ кыайар үлэтин барытын үлэлииллэрэ. Ити кэм оҕолоро улахан дьоҥҥо улахан күүс – көмө буолбуттара. Егор Филиппович онно үлэ араас көрүҥэр үлэлээбитэ. Бииргэ  төрөөбүттэртэн 4 буолан хаалбыттара. Бырааттара Серафим Элгээйигэ ыал буолан олорбута. Билигин суох. Владимир Тэҥкэҕэ – Бордоҥҥо ыал буолан олорбута. Билигин суох. Балта Марфа Маар Күөлгэ олорор, үс оҕолоох, уолугар олорор. Кэлин "Пионер” колхозка үлэлии сылдьан олоҕун аргыһын Матросова Акулина Николаевнаны көрсөн ыал буолбуттара. «Бэттиэмэ» ферматыгар иккиэн үлэлээбиттэрэ, 4 оҕоломмуттара. Оҕолоро оскуолаҕа киирэллэрин саҕана Тэҥкэҕэ көһөн киирбиттэрэ, ыалга дьуккаах олорон үлэлээн – хамнаан барбыттара. Бэйэлэрэ бас билэр дьиэлэрин оҕолоро оскуолаҕа үөрэнэ сырыттахтарына туттан киирбиттэрэ. Сэрии сылларыгар ас таҥас тиийбэт олоҕор үөскээн сылаабай доруобуйалаах буолан, ферма ыарахан үлэтигэр сылдьан Акулина Николаевна ыалдьан өр кэмнэргэ балыыһаҕа эмтэммитэ. Егор Филиппович Тэҥкэҕэ пенсияҕа тахсыар диэри атыыһыттаабыта. Бэйэлэрэ начальнай кылаас үөрэхтээх дьон үөрэх аныгы олоххо наадатын өйдөөн, оҕолорун үөрэххэ ыыталаабыттара. Биир киһи хамнаһыгар 2 студены үөрэттэрбиттэрэ. 2 кыра уолаттара оскуола кэнниттэн эмиэ анал идэни ылбыттара. Пенсияҕа тахсан баран 1980 сылтан сөбүлүүр дьарыгар булка ыкса  ылсан тыаҕа бултаан барбыта. Бастаан бэйэтин үөлээннээхтэрин кытта бултаабыта. Онтон эдэр уолаттары булт абылаҥар угуйбута. Ол иһигэр оҕолорун эмиэ. Ол курдук 85 сааьыгар дылы тыаҕа булка сылдьыбыта. Лаппа кырдьан баран Тэҥкэ үрэхтэригэр кыһыннары соҕотоҕун бултаабыта. Саас куска, сайын бултуур сиригэр атыгар оттоон, күһүн тайахха, киискэ, тииҥҥэ сылдьара. Кыра суоллаах тыһы кииһи дьаныһан суолласпакка эһиилгитигэр хааллара сатыыра, куһу көҥүллэннэҕинэ эрэ кустуура. Ол иһин «сокуон» киһитэ, «тойонноро» диэн аат иҥпитэ. Бултуур сирин саас – күһүн өттөөн, сылдьар ыллыктарын, суолларын маһын отун ыраастыы сылдьара. Дьэ ол курдук 85 сааһыгар диэри кыһыныгар туһаҕынан, капкааннаан бултаабыта. Онон сылы сыллаан сылдьан бултаан тыаттан тэйбэтэҕэ.  Сааһыран баран хараҕа мөлтөөн, тыатыгар бултуурун тохтоппута. Ол да буоллар эдэрдэргэ сүбэ – ама биэрэрин тохтоппотоҕо. Егор Филиппович хаамарын, салгыҥҥа сылдьарын сөбүлүүрэ. Ол иһин өлүөр дылы бэйэтин кыанар этэ. Кини 2015 сыллаахха  күн  сириттэн  барбыта.

 Ахтыыны  суруйдулар Егор Филиппович

 кыргыттара Татьяна Егоровна уонна Валентина Егоровна.