Егор  Филиппович СТЕПАНОВ

(1927 - 2016)

Үлэ бэтэрээнэ

     Степанов Егор Филиппович, 1927 сыллаахха Тэҥкэҕэ элбэх оҕолоох дьиэ кэргэҥҥэ  төрөөбүтэ, тыыл бэтэрээнэ.  Аҕата Степанов Филипп Еремеевич. Ийэтэ Степанова Дария Матвеевна. Бииргэ төрөөбуттэрэ барыта аҕыс оҕо төрөөбүтүттэн  ийэлээх аҕата түөрт оҕону тутан хаалбыттараэ,   балта Степанова Марфа Филипповна уонна бырааттара Владимир,  Серафим.     Аҕабыт кыратыгар иринньэх оҕо эбит.. Оҕо сааһы билбэтэх сэрии кэмин оҕолоро күүстэрэ кыайар үлэтин барытын улэлииллэрэ.  Ити кэм оҕолоро улахан дьоҥҥо улахан күүс-көмө буолбуттара. Аҕабыт   онно үлэ араас көрүҥэр үлэлээбитэ.   Бырааттара Серафим Элгээйигэ ыал буолан олорбута. Билигин суох, Владимир Тэҥкэҕэ-Бордоҥҥо ыал буолан олорбута. Билигин суох. Балта Марфа Маар-Күөлгэ олорор, ус оҕолоох, уолугар олорор. 

Кэлин "Пионер” колхозка үлэлии сылдьан олоҕун аргыһын Матросова Акулина Николаевнаны көрсөн ыал буолбуттара. «Бэттиэмэ» ферматыгар иккиэн үлэлээбиттэрэ, 4 оҕоломмуттара.

Оҕолоро оскуолаҕа киирэллэрин саҕана Тэҥкэҕэ көһөн киирбиттэрэ, ыалга дьукаах олорон, үлэлээн-хамнаан барбыттара. Бэйэлэрэ бас дьиэлэрин оҕолоро оскуолаҕа үөрэнэ сырыттахтарына туттан киирбиттэрэ. Сэрии сылларыгар ас таҥас тиийбэт олоҕор үөскээн, сылаабай доруобуйалаах буолан, ферма ыарахан үлэтигэр сылдьан ийэбит ыалдьан өр кэмнэргэ балыыһаҕа эмтэммитэ. Аҕабыт Егор Филиппович  Тэҥкэҕэ пенсияҕа тахсыар диэри продавецтаабыта. Кыра уола Михаил аҕатын кытары элбэхтик сылдьыспыта. «Аҕам Тэҥкэ маҕаһыыныгар атыыһыттаабыта. Сунтаартан таһаҕас ыла барарыгар арыт миигин илдьэ барара. Баржанан Сунтаартан суукканан айаннаан кэлэрбит. Ол сылдьыһарбын аһара астынар этим» диэн билигин ахтар. Бэйэлэрэ начальнай кылаас үөрэхтээх дьон үөрэх аныгы олоххо наадатын өйдөөн, оҕолорүн үөрэххэ ыыталаабыттара.  Биир киһи хамнаһыгар 2 студены үөрэттэрбиттэрэ. 2 кыра уолаттара оскуола кэнниттэн эмиэ  анал идэни ылбыттара. Аҕабыт оҕолоругар тоҥкуруун соҕус сыһыаннааҕа, ол да буоллар улаханнык мөхпөт, урукку төрөппүт сиэринэн талахтаах этилэр да биирдэ да таһыйбатаҕа. Кэлин сиэннэригэр ордук чугастык сыһыаннаспыта, атаахтатар этэ, куруутун сиэтэн сылдьара, пенсията кэллэ да хас биирдии сиэнигэр харчы биэрэрэ. Хамнас кэлбэт бириэмэтигэр ол биэрбит харчыта аһара көмөлөспүтэ. Онон сиэннэрэ эһээ сылаас сыһыанын билэн улааттылар. Пенсияҕа тахсан баран 1980 сылтан сөбүлүүр дьарыгар – булка ыкса ылсан тыаҕа бултаан барбыта. Бастаан бэйэтин үөлээннээхтэрин кытта бултаабыта. Онтон эдэр уолаттары булт абылаҥар угуйбута. Ол иһигэр оҕолорун эмиэ. Ол курдук 85 сааһыгар дылы тыаҕа булка сылдьыбыта. Лаппа кырдьан баран Тэҥкэ урэхтэригэр кыһыннары соҕотоҕун бултаабыта. Саас куска, сайын бултуур сиригэр атыгар оттоон, күһүн тайахха, киискэ, тииҥҥэ сылдьара. Кыра суоллаах тыһы кииһи дьаныһан суолласпакка эһиилгитигэр хааллара сатыыра,   куһу көҥүллэннэҕинэ эрэ кустуура. Ол иһин «сокуон» киһитэ, «тойонноро» диэн аат иҥпитэ. Бултуур сирин саас – күһүн өттөөн, сылдьар ыллыктарын, суолларын маһын отун ыраастыы сылдьара. Дьэ ол курдук 85 сааһыгар диэри кыһыныгар туһаҕынан, капкаанынан бултаабыта. Онон сылы сыллаан сылдьан бултаан тыаттан тэйбэтэҕэ. Сааһыран баран хараҕа мөлтөөн, тыатыгар бултуурун тохтоппута. Ол да буоллар эдэрдэргэ сүбэ-ама биэрэрин тохтоппотоҕо. Аҕабыт хаамарын, салгыҥҥа сылдьарын тохтоппотоҕо. Ол иһин өлүөр дылы бэйэтин кыанар этэ. Кини 2016 сыллаахха күн сириттэн барбыта.

 Ахтыыны  суруйдулар Егор Филиппович

 кыргыттара Татьяна Егоровна уонна Валентина Егоровна.