ЕГОРОВ Егор Васильевич

(1921-1957)

“Память”, 4 том, с. 165

Наҕараадалара: “Германияны кыайыы иһин» мэтээл.

Төрүт Бордоҥ киһитэ. Бииргэ төрөөбүттэр биэстэр, онтон иккитэ кыраларыгар олохтон туораабыттар. Дьиҥнээх фамилиялара Михайловтар диэн эбит. Тулаайах буоланнар тус-туһунан ыалга иитиллибиттэр. Бииргэ төрөөбүт убайдара Федоров Петр (Федорова Матрена Николаевна кэргэнэ) уонна Данилов Авдей Алексеевич эмиэ сэрии кыттыылаахтара.

Егор Васильевич иккис хомуурга түбэһэн сэриигэ 1942 с. бэс ыйыгар ыҥырыллыбыт. Уральскай байыаннай уокурук дьаһалыгар Челябинскай, Перьм, Троицкай куораттарга атаартаабыттар. Техника кырыымчык кэмигэр, сыыдам сырыылаах, тымныыттан-хомурахтан иҥнибэт хайыһар биригээдэлэрэ өстөөх ылбыт дэриэбинэлэрин төгүрүйэн, сибээстэһэр суоларын быһар соруктаахтара. Бу биригээдэлэргэ эдэр, доруобай, ыраах похуоттарга кыһыҥҥы тымныыны тулуйар кыахтаах буойуннары, үгүс өттүгэр сахалары сүүмэрдээн ылаллара.

Кини 12-с гвардейскай стрелковай корпуска киирэр 19-с хайыһар биригээдэтин састаабыгар сэриилэспитэ. 1943 с. олунньу 22 күнүгэр Ильмень күөлү түүн муус үрдүнэн туораан, өстөөх Старай Русса куораты кытта сибээстэһэр суоларын быһар сорук туруоруллубута. Олунньу 22 күнүгэр киэһэ 11 чааска 19-с хайыһар биригээдэтин сэрииһиттэрэ Маяк Железный диэн тумулунан күөл мууһугар киирбиттэрэ. Батальоннар түүнү быһа Ильмень мууһун устун айаннаабыттара. Сарсыарда халлаан лаппа сырдаабытын кэннэ нөҥүө кытыл көстүбүтэ. Ильмень күөлгэ буолбут кыырыктаах кыргыһыы туһунан “Бэлэм буол” хаһыат фотокорреспондена, сэрии кыттыылааҕа Иннокентий Петрович Канаев Бордоҥҥо командировкаҕа кэлэ сылдьан, оскуола оҕолорун кытта көрсүһүүгэ маннык кэпсээбитэ: “Ыраах иннибитигэр чугас-чугас үс дэриэбинэ баара көстүбүтэ. Хойут истибитим ити Малай Ужин, Ужин уонна Белоцерковь диэннэр эбит. Биһиги балачча тохтоон сотору буолаары турар сэрии алдьархайын санаан да көрбөккө турбуппут. Өстөөх эмискэччи биһиги диэки күүстээх уоту аспыта. Эмискэ онтон-мантан хаһыы-ыһыы буола түстэ. Мин аттыбар турбут эһиги биир дойдулааххыт Егоров Егор Васильевич охтон түспүтэ. Биһиги командирбыт “К бою, вперед!” диирин кытта “За Родину! Ураа!” диэн хаһыытаабытынан ыта-ыта иннибит диэкки ыстаммыппыт. Онтон Егор Васильевич түөһүгэр уонна илиитигэр ыараханнык бааһыран сыттаҕына санитардар булан госпитальга атаарбыттар”.

Ити курдук Старай Руссатааҕы улахан кыргыһыыга түөһүгэр, уҥа илиитигэр улаханнык бааһыран госпитальга сытан өр эмтэммит. Доруобуйата мөлтөөн, салгыы сэриигэ киирбэтэх, сыыйыллан дойдутугар эргиллибит. Дойдутугар кэлэн баран Кыһыл Баһыыка колхозка бухгалтерынан үлэлээбит. 1950 с. Краскова Анна Петровналыын ыал буолан, биэс оҕону күн сирин көрдөрбүттэр. Биир оҕолоро кыратыгар суох буолбут. Үөлээннээхтэрэ, биир дойдулаахтара кэпсииллэринэн, Егор Васильевич кэрэ сэбэрэлээх, аҕыйах саҥалаах, көнө сүрүннээх, үтүө майгылаах киһи эбит. Төһө да уҥа илиитэ такыччы остор, бултуурун сөбүлүүрэ. Кэргэниниин сэттэ эрэ сыл дьоллоохтук олорбуттара. 1957 с. сэриигэ ылбыт баастара бэргээн олохтон туораабыта. Кэргэнэ Анна Петровна эрдэ огдообо хаалан баран, иитиллибит эдьиийэ Даарыйалыын түөрт оҕотун иитэн, үөрэхтээх үлэһит дьон оҥорбуттара.