Тыыл, үлэ ветерана

Екатерина Алексеевна ИВАНОВА туьунан

сиэнэ, 10-с кылаас үөрэнээччитэ Спиров Сергей:

Биһиги эбэбит 1932 с. төрөөбүтэ, бииргэ төрөөбүт соҕотох эдьиийэ Спиридонова Варвара Алексеевна. Тулаайах буолан эдьиийэ Натаайга иитиллэн, эбэбит кыра сааһыттан үлэҕэ эриллэн улааппыта. Сэрии саҕаламмытыгар таайдара сэриигэ барбыттара. Оччотооҕу кэм оҕолорун курдук, үлэҕэ улахан дьону кытта тэҥҥэ сылдьаллара.

Кини үйэтин тухары колхозка, совхозка сүөһү иитиитигэр, ньирэй көрүүтүгэр үлэлээбитэ. Мэлдьи үрдүк көрдөрүүлээх үлэһит этэ. Холобур, 1962 с. Жданов колхоз 60 ньирэйин 100% тыыннаахтыы иитэн, сууккаҕа ыйааһыннарын 531 гр. Тиийэрин ситиспит эбит. Эдэригэр коммунистическай партияҕа чилиэнинэн киирбитэ. Үлэтигэр ситиһиилэрин иһин эбэбит 1963 с. Москваҕа Норуот хаһаайыстыбатын ситиһиилэрин быыстапкатыгар сылдьар чиэскэ тиксибитэ, коммунистическай үлэ ударнигһа, социалистическай куоталаһыы бастыҥа, элбэх бочуотунай грамоталардаах.

1963 с. эһэбит Иванов Николай Васильевиһы көрсөн ыал буолбуттара, үс оҕоломмуттара. Хомойуох иһин, кэргэнэ эрдэ өлөн, оҕолорун соҕотоҕун атахтарыгар туруортаабыта. Эбэбит Екатерина Алексеевна эйэҕэс майгылаах, кыыһырар диэни билбэт, ыалдьытымсах, минньигэс астаах хаһаайка, барыны сатыыр иистэнньэҥ быһыытынан биһиги өйбүтүгэр хаалбыт. Пенсияҕа тахсан да баран, үлэттэн тэйбэтэҕэ.