Тыыл, доруобуйа харыстабылын ветерана

Елена Тимофеевна НАЗАРОВА-Сиэстэрэ Иэлэ

туһунан Петров Владимир Николаевич-Бордоҥ Болуодьата:

Бордон нэһилиэгин бүтүн көлүөнэ дьонун, сымнаҕас, сылаас илиитигэр түһэрэн күн сирин көрдөрбүт аанньал тэҥэ эмчит Елена Тимофеевна Хаҥалас, билиҥҥитэ Кутана сиригэр Наһаардар диэн аҕа ууһугар төрөөбүтэ. 1944 с. Сунтаарга алта ыйдаах сиэстэрэ кууруһугар үөрэнэн, Бордоҥ детдомугар сиэстэрэнэн үлэтин саҕалаабыта. Кини Бордоҥҥо фельдшерскай-акушерскай пууҥҥа акушерка-сиэстэрэнэн 20 сыл эҥкилэ суох үлэлээбитэ.

Бордоҥҥо кэлэн Иванов Семен Федотович ( Сиэҥкэ) диэн Жданов колхоз бухгалтерыгар кэргэн тахсан түөр оҕоломмуттара, ытыктанар, сис ыал буолбуттара. Оҕолоро бары дьоһуннаах дьон буолбуттара: улаханнара Замира Семеновна уран тарбахтаах иистэнньэҥ буолан, Бордоҥ дьонугар элбэх таҥаһы тикпитэ. Надежда Семеновна үрдүк үөрэхтээх врач буолбута. Кыралара Болуодьа (Сээпэ) айылҕаттан талааннаах мас, тимир ууһа, художник, ханнык баҕарар техниканы оҥорор, сатаабатаҕа диэн суох. Бордоҥнор чаҕылхай талааннах дьонноруттан биирдэстэрэ кини буолар.

Елена Тимофеевнаны мин оскуолаҕа үөрэнэ сылдьан (мин эрэ буолуо дуо) «миигин төрөппүт акушерка» диэн ыраахтан ытыктыы көрөр киһим этэ. Ийэм Ульяна Егоровна кини туһунан «Иэлэ илиитэ сымнаҕас буолара» диэн мэлдьи истиҥ-иһирэх тылларынан ахтара. Кэлин улаатан баран кинини кытары кэпсэтэр буолбутум. Онно кини «Ийэҥ Ылдьаана кылбардык оҕолонооччу» диирэ. 60 сыл анараа өттүгэр 1954 с. балаҕан ыйын 16 күнүгэр Марба балыыһатыгар Алексеева Ольга Сергеевналыын биир күн биэстии мүнүүтэнэн быысаһан төрөөбүппүт. «Эһигини сүүрэ сылдьан төрөтөлөөбүтүм, Ылдьаана, Таанньа этэҥҥэ оҕоломмуттара. Эһигини иккиэҥҥитин чороччу суулаталаан бараммын баалынайга угаттаан атахтаһыннара сытыартаан утуталаан кэбиспитим, орон тиийбэт этэ. Биир күн иннинэ Екатерина Васильевна Кларатын оҕоломмута» диэн кэпсиирэ олус күндү да буолара.

Күн сирин көрөөрү, киһи буолаары кэлбит кырачааны акушерка аан бастаан сылаас, сымнаҕас илиитигэр түһэрэн көрсөр уонна ийэтигэр аҕалан көрдөрөр.Бу улуу дьыала буолбат дуо? Оннук күндү киһини - Елена Тимофеевнаны бордоҥнор умнубаттар, кини аата-суола өрүүтүн ахтылла туруохтун! Бу тылларбын бигэртэн үөлээннээҕим, эмиэ кини төлкөлөөбүт кыыһа Зинаида Егорова анабыл хоһоонун сэргээҥ, истиҥ.

Иэйиэхсиппит Иэлэҕэ

Оччугуйкаан бэйэтэ

Окусуорканан үлэлээн

Оҕо бөҕөнү төрөппүтэ,

Орто саастаах дьоннор - биһиги

Орто туруу дойдуга

Оройбутунан түһэрбитигэр

Нарын, сылаас илиитэ,

Эйэҕэс, үтүө бэйэтэ

Элбэх сылга олорорбутугар

Эттиин-хаанныын ситэрбитигэр

Илгэлээх санаатынан иитэн

Ийэ сиргэ кэлэрбитин

Көрсөрө кини бастаан.

Ыраах-чугас алаастарга,

Артыаллаһан олорор сирдэргэ

Ыҥыыр акка олорон,

Ардыгар сатыы да баран

Айанныыра түүннэри-күннэри.

Сэрии тыйыс кэмигэр

Айылҕа сүтэрбит ньургуннарын

Ситиһэргэ саҥнаах

Сиргэ киһи кэлэрэ

Кэмэ суох элбэ5э,

Сылга биэстии уонунан

Төрүүллэрэ оҕолор Марбаҕа.

Барыларыгар кини бара -

Былыргылыы «баабыска»,

Аныгылыы окусуорка,

Түөрэхпитин төлкөлөөбүт

Иэйиэхсиппит Иэлэ.