Елизавета Ивановна МИХАЙЛОВА

(1924-2008)

 Мин, Михайлова Елизавета Ивановна, 1924 сыллаахха төрөөбүтүм. Аҕам Михайлов Иван Степанович диэн киһи этэ. Төрөппүт ийэм Ылдьаана балтыбын Огдооһу төрөтөн баран «ыспааҥка» ыарыыга ылларан өлбүтэ. Миитэрэй, Хонооһой диэн убайдардаах этим. Хонооһой сэрии иннигэр ыалдьан өлбүтэ. Миитэрэй бастакы ыҥырыыга сэриигэ барбыта да эргиллибэтэҕэ. Биирдэ «Иркутскайга госпиталга сытабын» диэн сурук кэлбитэ уонна бүттэҕэ ол.

 Тэҥкэ оскуолата аан маҥнай аһылларыгар үөрэнэ киирбитим. Учууталым Ногнорутов Макар Дмитриевич диэн этэ. Олорор сирим ыраах буолан биир эрэ кылааска үөрэммитим.

 Сэрии саҕана улахан дьахталлары кытта байыаннай үөрэххэ үөрэммиппит. Учууталбыт Федоров Дмитрий Спиридонович дьиҥнээх саллааттары үөрэтэр курдук үөрэппитэ: хаарга сыыларбыт, граната быраҕарбыт, өрүскэ киирэн хайыһардыырбыт.

 Икки сыл муҥхаҕа  сылдьыбытым, ылбыт собобутун фроҥҥа ыытабыт дииллэрэ. Биир саас өрүс мууһа бара турдаҕына, Гуринова Дьэбдьиэй Ефимовна (билигин кыыһа Шура Дьокуускайга олорор) диэн эр киһи курдук күүстээх дьахтары кытта бэрэбинэ түрүлүөпкэлээбиппит. Кэлтэгэй отууга сиргэ хоно сылдьан 1 аттаах, 1 оҕустаах молоку сыарҕаҕа тиэйэн үлүгэрдээх элбэх бэрэбинэлэри Сунтаарга ааллаабыппыт. Бу маһы кыһыныгар Степанов Никифор, Матросов Ариан о.д.а. кэрдибиттэр этэ. Сунтаарга промкэмбинээккэ ыыталлар эбит. Ити үлэбит иһин Дьэбдьиэй биһикки Сталин «төбөлөөх» мэтээлинэн наҕараадаламмыппыт. Дьахталлартан бастакынан биһиги мэтээл ылбыппыт.

 Сэрии кэннитэн холкуоска ыанньыксытаабытым. 1960 сыллаахха Сунтаарга киирбитим. Иистэнэр буолан иис сыаҕар кэмбинээккэ үлэлээбитим.

       Ахтыыны суруйдум үлэ, тыыл бэтэрээнэ

Елизавета Ивановна Михайлова.

                                            06.03.2006 сыл.