Тыыл, педагогическай үлэ ветерана

Елизавета Ксенофонтовна СТАРОСТИНА:

Мин 1960 с. Ленинградтааҕы тыа хаһаайыстыбатын институтун бүтэрэн учуонай-зоотехник идэтин ылбытым. Икки сыл дойдубур «Абый» совхозка кылаабынай зоотехнигынан үлэлээбитим кэнниттэн тыа хаһаайыстыбатын министерствота Сунтаарга ыыппыта. Манна тутатына Жданов колхозкакылаабынай зоотехнигынан анаабыттара. Бастаан үлэлии кэлэрбэр кыра-кыра фермалар тыа үрэхтэринэн, ыраах сирдэргэ бытанан олороллоро. Онно кыһыннары-сайыннары ат көлөнөн тиийэҕин, барыгын-бары ыырданан с ылдьаҕын. Үүт ыамын үрдэтиигэ колхозка күүстээх үлэ саҕаланан эрэр кэмэ этэ. Ол да буоллар, биллэн турар, оччотооҕу кэмҥэ сүөһү иитиитин уопсай культурата намыһаҕа мэлдьэҕэ суох. Мин ити бириэмэҕэ Бордоҥ ветучаастагын сэбиэдиссэйэ А.Д. кэнниттэн практикатын ааһан, үөрэҕи бүтэрэн, кэлин ветучаастак сэбиэдиссэйинэн анаммыт Владимир Гаврильевич Петровтыын бииргэ үлэлээбитим.

Түөрт сыл устата ынаҕы аппаратынан ыаһыны балачча киллэрбитим. Бастаан туттарга сүрдээх уустуктардаах этэ. Ынахтар аһара мөхсөллөрө, ыанньыксыттар да сорох өттүлэрэ сөбүлээбэт этилэр. Кытаанах ирдэбили туруоран, механическай ыаһыны син биир киллэрбиппит.

Колхозка директордыы сылдьан партия уобаластааҕы комитетын чилиэнигэр кандитатынан талылла сылдьыбытым, икки төгүл Саха АССР Верховнай Сэбиэтин президиумун бочуотунай грамотатынан наҕараадаламмытым.

СГУ-га кэтэхтэн үөрэнэн 1964 с. биология учууталын идэтин ылан 24 сыл устатыгар Бордоҥ орто оскуолатыгар химия учууталынан үлэлээбитим. Уопсайа 10 кылааһы выпустаабытым. Үөрэтэн-иитэн таһаарбыт оҕолорум норуот хаһаайыстыбатын араас салааларыгар, үгүстэрэ үрдүк үөрэхтэнэн ситиһиилээхтик үлэлии сылдьалларыттан үөрэбин. Үөрэнээччилэрин үлэнэн иитиигэ болҕомтобун ууран үлэлээбитим. Бордоҥ орто оскуолатыгар кэккэ сылларга животноводство уруогун үөрэтэрбэр практическай хабаанынан Анабыга «Смена» үлэ-сынньалаҥ лааҕырын тэрийэн үлэлэппитим. Үлэбит үрдүктүк сыаналанан, оройуоҥҥа тиийэ биллибиппит. Оҕону үлэҕэ сыһыаран иитии олус суолталааҕын бэлиэтиэхпин баҕарабын.

Иккис дойду оҥостубут Бордоҥ сиригэр кэргэним Петр Николаевич Степанов совхоз директорын, нэһилиэк бастакы баһылыгын быһыытынан түбүктээх олоҕун тэҥҥэ үллэстэн, билигин иккиэн бочуоттаах сынньалаҥҥа олоробут. Икки кыыстаахпыт.