Тыыл, үлэ ветерана

Емельян Алексеевич ДАНИЛОВ туһунан

кыыһа Данилова Евдокия Емельяновна:

Биһиги аҕабыт 1928 с. Ымырдар диэн сиргэ биэс оҕолоох Данилов Өлөксөйдөөх Дьэбдьиэҕэ үһүс оҕонон төрөөбүтэ. Аҕалара эрдэ өлөн ийэлэрэ ииппит. Бииргэ төрөөбүт убайа Данилов Иван Алексеевич сэриигэ бастакы хомуурга ыҥырыллан барбыт уонна эргиллибэтэх. Бииргэ иитиллибит убайа Данилов Авдей Алексеевич үлэ фронугар сылдьан кэлбит.

Сэрии саҕаланыытыгар аҕабыт 13-тээх уол ийэтин, балтыларын көрөр-истэр киһи буолар, аччыктыыры, тоҥору этинэн-хаанынан билэр. Ол ыарахан кэмнэргэ балыктаан, туһахтаан тыыннаах хаалбыппыт, киэһээҥҥи аһылык булаары оскуолаттан үөрэнэн бүтээт, аччык оҕо туһахтарбын көрө барарым диэн кэпсиирэ.

Сэттэ кылаас үөрэхтээх 1944-1945 сс Ааҕар балаҕаҥҥа сэбиэдиссэйинэн үлэлиир. 1945 с. бүтүүтэ 17-лээх уолу детдомҥа иитээччинэн анаабыттар. Манна 1950 с. диэри үлэлээбитэ, билигин иитиллээччилэрэ кини туһунан ахтыыларыгар олус истиҥник суруйалларын ааҕан үөрэбит. Манна үлэлии сылдьан ийэбитин Александрова Анна Николаевнаны көрсөн 1949 с. ыал буолбуттара. Ийэбит Ньурба Аканатыттан төрүттээх, детдомҥа поварынан, онтон кэлин пенсияҕа тахсыар диэри детсадка поварынан үлэлээбитэ. Аҕалаах ийэбит детдомҥа үлэлээбит кэмнэрин наһаа үчүгэйдик саныыр этилэр. Ол туоһутунан иитиллибит оҕолоро Дьокуускайтан, Мирнэйтэн, Өлүөхүмэттэн кинилэр махталлаах иитиллээччилэрэ кэлэн көрсөн барар буолаллара.

1949 с. Сунтаарга МТС тэриллибитигэр заправщигынан, тракториһынан үлэлээбитэ, кэлин 1958 с. Жданов колхозка трактористаабыта. Ол кэмнэргэ ДТ-54 тракторынан Мухтуйаттан таһаҕас таһаллара. Бордоҥ оскуолатын, кулуубун маһын тиэйсибитим диэн кэпсиирэ.

Спортка сыһыаннаах буолан спортинструктордыы сылдьыбыта, атах оонньуутунан дьарыктанара, хойукка диэри ыһыахтарга судьуйалыыр этэ. Пенсияҕа тахсан баран кадровай булчутунан сылдьыбыта. Ити кэмҥэ куоракка баар Айылҕа харыстабылын тэрилтэтигэр корреспонденнаабыта, сурук суруйан ыытар этэ.

Дьоммут сэттэ оҕону төрөтөн, элбэх сиэннэнэн, хос сиэннэнэн 60-ча сыл бииргэ, дьоллоохтук олорбуттара.