Тыыл, үлэ ветерана

Евдокия Егоровна НИКОЛАЕВА туһунан

сиэнэ Андрей Уаров:

Эбэм күлүмнүүр күөллэрдээх Күүкэй сиригэр 1928 с. ыам ыйын 10 күнүгэр дьадаҥы бааһынай кэргэнигэр күн сирин көрбүт. Алта саастааҕар ийэтэ өлбүт, эһэлээх эбэтэ соҕотох кыыстарын оннугар хаалбыт тулаайах кыра кыысчааны олус маанылан, атаахтатан ииппиттэр. Кыра сааһыттан эһэтин кытта оттоон, Күүкэй күөллэригэр балыктаан, куска тиргэлээн, үлэҕэ эриллэн улааппыт. Аҕыс саастааҕар Күүкэй начальнай оскуолатыгар, онтон Кутанаҕа 5-6 кылаастарга дьиэтиттэн хааман үөрэммит. Сэрии сылларыгар Элгээйи 7 кылаастаах оскуолатын бүтэрэн баран Бүлүүтээҕи педагогическай училищеҕа үөрэнэ киирэр. Икки сыл үөрэнэн баран дьоно кыаммат буоланнар төннөн кэлэр, онон кэтэхтэн үөрэнэргэ күһэллэр.

Бордоҥҥо 1946 с. Марба бөһүөлэгэр начальнай кылаас учууталынан ананан үлэлии кэлбит. Манна фронтан кэлбит саллаат Уаров Сергей Николаевиһы көрсөн 1948 с. ыал буолбуттар. Итинтэн ыла Бордоҥу иккис дойду оҥостон, оҕо-уруу тэнитэн, үлэлээн-хамсаан барбыттар. 1948-53 сс. Евдокия Егоровна детдомҥа иитээччинэн үтүө суобастаахтык үлэлээбитэ.

1963 с. Бордоҥҥо сибээс отделениета аһыллыбытыгар Евдокия Егоровна бастаан почтальонунан, коммутатор-телефониһынан, операторынан, онтон опытыран 1971 сылтан бочуоттаах сынньалаҥҥа тахсыар диэри сибээс отделениетын начальнигынан үлэлээбитэ. Евдокия Егоровна начальнигынан үлэлиир кэмигэр сибээс отделениетын үлэтэ тупсубута, бэчээккэ сурутууга тиэрдиллэр былааны мэлдьи аһара толороллоро. Сибээс үлэтин үчүгэйдик тэрийбитин уонна өр сыллаах сыралаах үлэтин иһин Евдокия Егоровна IX, X пятилеткаларга сибээс туйгунун аатын ылбыта, Коммунистическай үлэ ударнига, үлэ ветерана буолбута. Саха АССР Верховнай Сэбиэтин, партия райкомун, райсовет, нэһилиэк, дьахтар сэбиэтин элбэх бочуотунай грамоталарынан наҕараадаламмыта. Итини таһынан бэчээти нэһилиэнньэ киэҥ араҥатыгар пропагандалааһыҥҥа утумнаах үлэтэ үрдүктүк сыаналанан «Cельская жизнь», «Кыым», «Бэлэм буол», «Советская Россия», «Экономическай газета», «Эдэр коммунист» хаһыаттар редакцияларыттан хайҕал уонна бочуотунай грамоталарынан наҕараадаламмыта. Кини сибээс үлэтигэр 25 сыл тохтобула суох үлэлээн баран бочуоттаах сынньалаҥҥа тахсыбыта.

Нэһилиэккэ ыытыллар тэрээһиннэргэ, уус-уран самодеятельноска кэргэнэ, биһиги эһэбит Сергей Николаевичтыын Марбаҕа олохсуйуохтарыттан активнайдык кытталлара. Ордук табыллан сценкаларга, испэктээкиллэргэ оонньууллара, сотору-сотору гастролларга сылдьаллара, оройуоҥҥа нэһилиэктэрин чиэһин элбэхтик көмүскээбиттэрэ. Маны таһынан дьахтар комитетыгар, агитквартираҕа агитаторынан эҥкилэ суох үлэлээн дьон-сэргэ ытыктабылын ылбыта.

Эбэм Евдокия Егоровна түөрт оҕо амарах ийэтэ, элбэх сиэн, хос сиэн тапталлаах эбэлэрэ. Кини оҕолоро бары дьоһун-мааны ыал, үлэһит үтүөтэ буолан тахсыбыттара. Улахан уола Александр Сергеевич учуутал, экономист идэлээх, Ил Түмэн депутата, икки оҕолоох, элбэх сиэннэрдээх. Кыыһа Вера Сергеевна сиэстэрэ идэлээх, түөрт оҕолоох, элбэх сиэннэрдээх. Кыра кыыһа Евгения Сергеевна фельдшер идэлээх, Саха республикатын доруобуйатын харыстабылын туйгуна, икки кыыстаах, сиэннэрдээх. Кыра уола Юрий Сергеевич - мин аҕам суоппар идэлээх, икки оҕолоох.

Эбэм Едокия Егоровна 80-тан тахсан баран 2011 с. ыалдьан биһиги кэккэбититтэн туораабыта. Эбэм миигин кыра эрдэхпиттэн кинигэни таптыырга, ааҕарга уһуйбута, Максим Горькай «книга - друг человека» диэн бэргэн этиитин өрүү санатара өйбөр хатанан хаалбыт. Уол оҕо буолан бултаан-алтаан кэллэхпинэ эбэм үөрэ- көтө көрсөрө, «оҕо булдун тута астаан үөрэ-көтө амсайар куолута» диэн дьоммор сүбэлиирэ. Кыра эрдэхпиттэн эбэм сүбэтинэн аҕабын кытта тэҥҥэ эр киһи үлэтин көрө сылдьан, илии-атах буолан көмөлөһөн улааппытым. Эбэбин кытта бииргэ олорон, кини хараҕын далыгар улааппытым - мин дьолум дии саныыбын. Мин күндү эбэбин Евдокия Егоровнаны өрүү ахта-саныы сылдьыаҕым, кини туһунан сырдык өйдөбүл оҕолоругар, сиэннэригэр хаалыаҕа.