Тыыл үлэ бэтэрээнэ Григорий Дмитриевич фИЛИППОВ

Мин билигин 79 сааспар сылдьабын. 8 саастаахпар кыайыы буолуо икки хонук иннинэ ийэм өлбүтэ. Ол сыл аҕабын Филиппов Григорий Дмитриевиһи, Хадаҥҥа Энгельс холкуоска бэрэссэдээтэллээн олордоҕуна, Бордоҥ нэһилиэгин хаалыылаах холкуоһугар бэрэссэдээтэлинэн анаабыттара. Салгыы аны Улгумдаҕа «Каганович» холкуоска эмиэ бэрэссэдээтэлинэн анаабыттара. Сэрии тулаайахтарын, огдооболорун олохторун көрөн истэн, атахтарыгар туруортаан үлэлээбитэ. Аҕам Григорий Дмитриевич көҕүлээһининэн ыраах бөһүөлэктэри – Марбаны, Улгумданы, Муолатаптары уруккута Кураанах үрyooy, билиҥҥи Бордоҥҥо көһөртөөн киллэрбитэ. Үгүс кырдьаҕас буолумматаҕа, ону аҕам өрүс үрдүгэр, уу суолунан сырыы баар буолуо диэн улахан сыратын биэрэн бөһүөлэги көһөрбүтэ уонна бэйэтэ маҥнайгынан дьиэ туттубута. Бастаан Петров Эдуард Гаврильевичтааҕы икки ыал олорбуттара, онтон кыра-кыралаан дьон киирэн испиттэрэ. Марбаттан эргэ оскуоланы көһөрөн киллэрбиттэрэ, өрүс үрдүгэр тыаны солоон уһаайба таһааран, аҕам салалтатынан маҕаһыын тутуллубута. Аҕам туох да үөрэҕэ да суох буоллар, холкуос бэрэссэдээтэлинэн, атыыһытынан үлэлээбитэ. Миигин суоту тардарга, хайдах атыылыырга үөрэппитэ, аҕабыныын бииргэ маҕаһыыҥҥа үлэлиир этибит. Ол иннинэ саһыл ферматыгар үлэлээбиппит, ол кэмнэргэ комсомолга киирбитим. Фермаҕа арыыһытынан эмиэ үлэлии сылдьыбытым. Кэлин 25 сыл Сардаҥаҕа атыыһытынан үлэлээбитим, бочуот дуоскатыгар хаста да тахсыбытым, райсоюз, сельпо, «Холбос» наҕараадата да элбэх этэ. 50 сааспар диэри үлэлээн баран бочуоттаах сынньалаҥҥа барбытым. Оччолорго атыыһыт үлэтэ наһаа ыарахан этэ. Отчуттарга, сайылыктарга, нэһилиэктэринэн тиэйэ сылдьан атыылыырбыт. Мин эһэм Филиппов Дмитрий Николаевич «Холбоско» орденнаах бэрэссэдээтэл этэ, онтон аҕам потребкооперация туйгуна, коммунистическай үлэ ударнига, элбэх мэтээллэрдээх, бэлиэлэрдээх этэ. Төрүппүтүн утумнаан оҕолорум, сиэннэрим эмиэ атыынан-эргиэнинэн утумнаахтык дьарыктаналлар, дьоҥҥо үтүөнү оҥороллор.

Сэрии кэмин оҕото, үлэ бэтэрээнэ Люция Григорьевна ПЕТРОВА