Гуринов Александр Афанасьевич

 Тыа хаһаайыстыбатыгар үчүгэй үлэтин иһин бүтүн союзтааҕы үлэһиттэр профсоюзтарын бочуотнай грамотатынан наҕараадаламмыта, "Сунтар" совхоз үбүлүөйнэй бэлиэтин хаһаайына, өр кэмҥэ оҕо уһуйааныгар үтүө суобастаахтык үлэлээн Саха Өрөспүүбүлүкэтин оскуола иннинээҕи үөрэхтээһин үбүлүөйнэй бэлиэтинэн наҕараадаламмыт үлэ бэтэрээнэ, хаарынан, маһынан оҥоһуктар күрэхтэрин хас да төгүллээх кыайыылааҕа.

Мин, Гуринов Александр Афанасьевич 1954c. Тэҥкэҕэ төрөөбүтүм. Сэттэ ыйдаах оҕону Сидоров Николай Афанасьевич, Семенова Марфа Евсеевна диэн ыаллар ылан ииппиттэрэ. Оҕолоро суох этэ, кэлин Валя диэн кыыстаммыттара.

Валя Даниллыын ыал буолан 2 уол, 2 кыыс оҕоломмуттара, күтүөт Мэҥэ-Хаҥаластан төрүттээх көнө-көрсүө киһи этэ, Тэҥкэҕэ суоппарынан үлэлээбитэ. Дьонум колхоз, совхоз үлэтигэр илиилэрин араарбакка үлэлээбиттэрэ. Онон ферма үлэтин кыра эрдэхпиттэн эппинэн-хааммынан билбитим.

Аҕам колхоз саҕана сылгыһытынан уонна тутууга үлэлээбитэ. Уойар сүөһүгэ 1978 сыллаахха үлэлээбиппит, 2 саастаах 210 төбөнү туппуппут, барытын этэҥҥэ кыстатан күөххэ үктэннэрбиппит. Бастакы тапталбынаан Марина Капитоновналыын Игорь, Лена диэн оҕолордоохпут, сиэннэрдээхпит. Билигин иккис кэргэмминээн Галина Афанасьевналыын Сунтаарга олоробут, детсадка үлэлээн баран, пенсияҕа олоробун кыралаан уһанабын.

Мин Тэҥкэ оскуолатыгар төрдүс кылааһы бүтэрэн баран Тойбохойго бэһискэ үөрэммитим. Бордоҥ оскуолатыгар алтыс, сэттис кылаастарга. Бордоҥ оскуолатыгар үөрэммит кэммин, кылааһым оҕолорун, учууталларбын наһаа күндүтүк саныыбын. Тэҥкэттэн элбэх буолан үөрэммиппит Степанов Валерий, Иннокентьев Гоша, Тихонов Радомир, Индеев Борис.

Оскуолаҕа ыытыллар мероприятиеларга кылааһынан көхтөөхтүк кыттарбыт. Саас саһааҥҥа сылдьарбыт, хотон хаарын түһэриитэ, күһүн хортуоска, моркуоп хостооһуна. Средаҕа, субуотаҕа, өрөбүлгэ оҕолорго киинэ буолара, онно сылдьарбыт.

Биһиги, Тэҥкэлэр арыт субуотаҕа дойдубутугар сатыы, арыт велосипедынан барарбыт, өрөбүлгэ төннөрбүт. Ыраах да хаамар эбиппит диэн билигин техника үйэтигэр салла саныыбын.

Билигин да бииргэ үөрэммит оҕолорбутун кытта билсиһэбит, көрсүһэбит, ватсапка одноклассники диэн чаттаахпыт.

1998 сылга пенсияҕа тахсыахпар диэри "Бордоҥ" совхозка үлэлээбитим. Үчүгэй үлэм иһин Бүтүн Союзтааҕы үлэһиттэр профсоюзтарын бочуотнай грамотатынан наҕараадаламмытым. 2002 сылтан "Туллукчаан" оҕо сайдар киинигэр үлэлээбитим, онно араас оҥоһуктары, саха иһитин-хомуһун, сиэр-туом тэриллэрин оҥорорум. Уолаттарга "Кырачаан уустар" диэн куруһуогу үлэлэппитим, оҕолор сөбүлээн дьарыктаналлара. Ону таһынан муустан, мастан кыһан, араас оҥоһуктары оҥорорбун сөбүлүүбүн.

Ийэлээх аҕам билигин суохтар, кинилэр ситэри олорботох олохторун оҕолоро сиэннэрэ салгыахтара. Мэлдьи ахта-саныы сылдьыахпыт.