Тыыл, үлэ ветерана

Ирина Афанасьевна ПРОКОПЬЕВА туһунан

уола Попов Михаил Тимофеевич:

Ийэм 1926 с. Бордоҥ нэһилиэгэр күн сирин көрбүтэ. Бииргэ төрөөбүттэрэ түөрт этилэр, үс уол быыһыгар соҕотох кыыс этэ.

Тиийиммэт ыалга төрөөбүт буолан оскуола диэни билбэтэҕэ. Кыратыттан үлэҕэ сыстыбыт буолан үлэттэн толлубат этэ, ыарахан үлэни барытын кыайара. Жданов колхозка ыанньыксытынан үлэлээбитэ. Үлэтин түмүгүнэн 1970 с. В.И. Ленин үбүлүөйдээх мэтээлинэн наҕараадаламмыта, Ленин юбилейынан тэнитиллибит Бүтүн союзтааҕы куоталаһыыга бастаабыта. Үчүгэй үлэтин иһин Москва куоракка Норуот хаһаайыстыбатын ситиһиилэрин быыстапкатыгар путевканан күүлэйдээн кэлбитэ. Элбэх кэпсээннээх, үтүө санаалаах, үгүс дьүөгэлээх, төһө да куолаһа хойуутун иһин, эйэҕэс майгылаах үтүө киһи этэ диэн үөлээннээхтэрэ кэпсииллэрэ. Үйэтин тухары ыанньыксытынан үлэлээбитэ. Попов Тимофей диэн киһиэхэ кэргэн тахсан сэттэ оҕону төрөтөн улаатыннартаабыта. 1975 с. балаҕан ыйыгар ыарахан ыарыыттан үчүгэйдик эмтэммэккэ сылдьан күн сириттэн туораабыта.