ИВАНОВ Егор Афанасьевич

(1914-1990)

«Память», 4 том, с. 165

Наҕараадалара: «Бойобуой үтүөлэрин иhин» (өстөөх улахан танкатын умаппытын иһин), икки «Хорсунун иhин» (бастакы бааhырыытын кэнниттэн өстөөх хас да танкатын алдьаппытын иһин), «Германияны кыайыы иhин», Ийэ дойду иhин туйгуннук сэриилэспитин иhин значок, «Кыhыл сулус» (Украина сиригэр кыргыhыыга станковай пулеметунан өстөөх 63 саллаатын суоһарбытын иһин, 1944 с. от ыйа), Аҕа дойду сэриитин 1 степеннээх (1985 с. кулун тутар 11 күнэ) орденнар, элбэх үбүлүөйдээх мэтээллэр

1914 с. Чакыр нэһилиэгэр (Күндэйэ) төрөөбүтэ. 1936 с. 4 кылааһы бүтэрбитэ. 1937 с. ветеринарнай санитардар курстарын бүтэрэн баран, Сунтаар ветучаастагар идэтинэн үлэлии олорон 1941 с. сэриигэ барбыта.

Молотов станцияҕа понтоннай ротаҕа 3 ый үөрэммитин кэннэ Дарсаҥҥа байыаннай чааска сулууспаҕа ыыталлар. Ити сиргэ кини пекарынан сылдьыбыт. Ас-таҥас кырыымчыгар, олорор сирдэрэ тымныыта дьайан, элбэх киһи тоҥон, аччыктаан, ыалдьан сэриигэ тиийбэккэ өлбүт. Кэлин сэрииттэн кэлбит дьон ахтыыларыгар, Егор Афанасьевич туһунан "килиэп биэрэн олохпун быыһаабыта” диэн суруйбуттара баар.

1943 с. тохсунньу 5 күнүгэр арҕаа сэбиэскэй чаастар Орел куораты немецтэртэн босхолообут кэмнэригэр фроҥҥа тиийбит. Бастакы сүрэхтэниитигэр 9-с гвардейскай 18-с полкаҕа 43 суукка устата тохтоло суох сэриигэ сылдьан Челябинскай уобалас киһитиниин иккиэйэҕин тыыннаах хаалбыттар. Танканы уматар саанан өстөөх улахан танкатын уматан бастакы мэтээлинэн наҕараадаламмыт. Итиннэ илиитигэр бааһыран үс ый госпитальга эмтэммит, онтон чааһыгар төннүбүт. Иккиһин кыргыһыыга киирэн баран өстөөх хас да танкатын алдьатан « Хорсунун иhин» мэтээлинэн иккитэ наҕараадаламмыта.

Смоленскай, Калининскай уонна 2-с Украинскай фроҥҥа станковай пулеметунан сэриилэспит. Хорсун буойун 1945 с. Украина сиригэр сэриилэһэ сылдьан илиитигэр, атаҕар бааһыран, атаҕын тобугун үрдүнэн быстаран кыргыһыы хонуутуттан туораабыта. Бүтэһик кыргыһыытыгар пулеметунан өстөөх 63 саллаатын суох гынан «Кыһыл сулус» орденынан наҕараадаламмыта.

Ити сыл кулун тутарга Дьокуускайга, бэс ыйыгар дойдутугар Сунтаарга эргиллэн кэлэн, урукку идэтинэн - ветеринарнай фельдшерынан пенсияҕа тахсыар диэри Элгээйигэ, Куокунуга, Бордоҥ Улгумдатыгар, Марбатыгар, Сунтаарга, Хадаҥҥа, онтон эмиэ Бордоҥҥо, пенсияҕа тахсан баран өссө Кэппэндээйигэ икки сыл баран үлэлээбитэ. Кэргэнэ Ильина Елена Степановналыын сэттэ оҕону төрөтөн, үөрэттэрэн, үлэһит дьон оҥорбуттара.

Улахан уола Юрий Егорович ырыа, муусука учуутала идэтинэн бастаан Сиэйэҕэ, кэлин өр сылларга пенсияҕа тахсыар диэри Бордоҥ оскуолатыгар үлэлээбитэ. Икки оҕолоох: уола Александр физика учуутала, үс уоллаах туспа ыал, кыыһа Маайа – психолог идэлээх, оскуолаҕа куруһуок салайааччыта. Розалия Егоровна Томскайга топограф идэтин ылан пенсияҕа тахсыар диэри Красноярскайга үлэлээбитэ, билигин да онно олорор. Роберт Егорович суоппар идэлээх, 6 оҕолоох: үс уол, үс кыыс, 2013 с. Күндэйэҕэ олорон ыарахан ыарыыттан олохтон туораабыта. Венера Егоровна– оҕуруотчут идэлээх, түөрт оҕолоох, Бордоҥ олохтооҕо. Рея Егоровна эт-үүт технолога идэлээх, Мирнэй куорат Новайыгар олорор, үлэлиир, уола Борис үрдүк үөрэхтээх электрик, Мирнэйгэ үлэлиир. Игорь Егорович армияҕа сулууспалыы сылдьан олох эдэригэр өлбүтэ. Оһоҕос түгэҕэ уола Радослав Егорович – суоппар, биэс оҕолоох: икки уол, үс кыыс, эдэр сааһыгар олохтон туораабыта.

Хорсун саллаат, тыа сирин бэтэринээрэ, улахан дьиэ кэргэн аҕа баһылыга Егор Афанасьевич Иванов Сунтаарга кыра кыыһыгар Рея Егоровнаҕа олорон 1990 с. сэтинньи 18 күнүгэр олохтон туораабыта.

(Иванов Е.А. бэйэтэ суруйбут ахтыыларыгар олоҕуран улахан уола ИВАНОВ Юрий Егорович суруйда)