Тыыл, үлэ ветерана

Христина Гаврильевна ФЕДОРОВА:

Мин 1933 с. кулун тутар 16 күнүгэр Хадан нэһилиэгэр төрөөбүтүм. Ийэм Матрена Капитоновна, аҕам Федоров Гаврил Кыһыл Баһыыка колхозка от- мас тиэйиитигэр үлэлээбиттэрэ. Бииргэ төрөөбүттэр 12 оҕо төрөөбүтүттэн сэттэтэ улаатан киһи-хара буолбуппут. Элбэх оҕолоох, ас- таҥас кырыымчык буолан мин ийэм убайыгар - таайбар Мартынов Николай Капитновичка 9 сааспар диэри иитиллибитим. Онтон салгыы аҕам дьонугар олоро барбытым. Инньэ гынан бииртэн биир ыалга көһө сылдьан иитиллибит буолан, оскуолаҕа үөрэммэтэҕим.

Сэрии ыарахан сылларыгар үлэ араас көрүҥүн улахан дьону кытары бииргэ үлэлиирбит, оҕо саас кэрэ кэмнэрин билбэккэ улааппытым. Убайбыт Сүөдэр Марбаттан балыктаан аһаталаан тыыннаах хаалбыппыт.

Кэлин Мартыкы Миисэлиин Кэппэндээйигэ үлэлии барбытым, онно түөрт сыл ГРЭС-кэ санитарканан, онтон Элгээйигэ биир сыл үлэлээбитим. Бордоҥмор төннөн кэлэн үөрүйэхпинэн балыыһаҕа санитарканан киирбитим уонна ити тэрилтэттэн пенсияҕа тахсыбытым. Билигин 5 оҕо, 12 сиэн, 6 хос сиэн эбэтэ буолан бочуоттаах сынньалаҥмар олоробун.