Тыыл, үлэ ветераннара

Кирилл Павлович, Екатерина Матвеевна АЛЕКСЕЕВТАР

тустарынан уоллара Алексеев Иван Кириллович:

Аҕабыт 1930 с. Бүлүү куоракка төрөөбүтэ. Олоҕо ыарахан этэ. Ийэтэ кыратыгар өлөн аҕата соҕотоҕун ииппитэ. Арыый обургу сырыттаҕынан аны аҕата хараҕынан кыайан көрбөт буолар. Алдьархай аргыстаах буолар дииллэринии, сэрии сылларыгар, аччыктааһын кэмигэр аҕыйах быһыы лэппиэскэ туһугар хаайыыттан күрээбит дьон аҕатын өлөрөн кэбиһэллэр. Кыл-мүччү куотан чугас олорор ыалга тыллаан КГБ-лар кэлэн хаайыылаах күрүөйэхтэри туппуттара диэн биһиэхэ кэлин кэпсиирэ.

Бииргэ төрөөбүт убайым байыаннай летчик буолуохтаах диэн ыраах куораттарга суруйан ыйыталаспыта да, кыайан булбатаҕа. Тэҥкэҕэ алмааһы көрдүүр экспедицияҕа шурфа хаһыытыгар үлэлээбитэ. Манна үлэлии сылдьан 1952 с. ийэбитин Семенова Екатерина Матвеевнаны көрсөн ыал буолаллар. Аҕабыт биһигини, уолаттарын, кырабытыттан илдьэ сылдьан үлэҕэ үөрэппитэ. Наһаа кытаанах, ирдэбиллээх киһи этэ.Нокуурапка совхозка анаан кирпииччэ үктүүр этибит, нуормабыт хас биирдиибитигэр күҥҥэ 100-түү устуука. Арыый улааппыппыт кэннэ аҕабыт салайар улахан дьон звенотугар оттуурбут. Киирэпкэ, Ымсыыга, Элгээҥҥэ, Хомустаахха, кэлин Үлэгир диэн үрэх баһыгар тахсыбыппыт. Тыраахтарынан, атынан бадараан ортотунан айаннаан оттуур сирбитигэр тиийэрбит. Бары өрөбүлэ суох сынньаммакка сайыны быһа оттуурбут. Сарсыарда эрдэттэн киэһэ хойукка диэри ходуһаттан тахсыбат буоларбыт. Ирдэбилэ да кытаанах этэ. Ити курдук окко сэттэ уол бары оскуоланы бүтэриэхпитигэр диэри үлэлээбиппит. Сыл аайы улууска бастакы миэстэни ыларбыт. Өр сыралаах үлэбит түмүгэ үрдүктүк сыаналанан, 1976 с. аҕабытыгар «Москвич” массыына фондатын биэрбиттэрэ. Хас да төгүллээх коммунистическэй үлэ ударнига, элбэх грамотанан, мэтээллэринэн, наҕараадаламмыта. Кэлин сэрии ветерана удостверениены биэрбиттэрэ.

Эдэр сылдьан тутууга үлэлээбитэ, Сардаҥа кулуубун, оскуоланы, мастарыскыайы тутуспута. Кыһын муҥхалааһыны олус бэркэ тэрийэн ыытара. Мындырдаан, сатабыллаахтык түһэрэн балык бөҕөтүн ылар этэ. Үөлээннээхтэрэ хойукка диэри Кириил муҥханы үчүгэйдик тэрийэн балык бөҕөтүн сиир этибит диэн санаан-ахтан ааһаллара.

Аҕам эдэр эрдэҕиттэн ыарахан үлэҕэ эриллэн, ыарытыйан баара суоҕа 59 сааһыгар 1989 с. кулун тутар 24 күнүгэр өлбүтэ.

Ийэбит Екатерина Матвеевна 1931 с. ыам ыйын 7 күнүгэр Куокунуга төрөөбүтэ. Аҕабытыныын 37 сыл бииргэ олорон сэттэ уол, икки кыыс оҕоломмуттара. Ийэбит кырабытыгар үлэлээбэккэ олорон биһини көрөн-харайан улаатыннартаабыта. Кэлин детсадка иһит сууйааччынан, онтон 1985 с. диэри совхозка кочегарынан үлэлээбитэ. Биһиги уолаттар уочаратынан ийэбитигэр көмөлөһөн үлэтин чэпчэтэрбит. Элбэх оҕолоох буолан “Материнство” мэтээлинэн, “Материнская слава” орденынан наҕараадаламмыта, коммунистическэй үлэ ударнига, үлэ ветерана этэ. Пенсияҕа тахсан баран дьиэтигэр сүөһүтүн көрөн олорбута. Ийэбит 2005 с. өлбүтэ.

Ийэлээх аҕабыт

олорон ааспыт олохторун сиэннэрэ салгыыллар.