Тыыл, үлэ ветерана

Ксения Кононовна ЛУКИНА (СЕКИРОВА) туһунан

дьүөгэтэ, ыкса ыала Омукова Александра Григорьевна,

2015с. муус устар 4 күнэ:

Мин Ксения Николаевнаны оскуолаҕа 6-7 кылааска үөрэниэхпиттэн билэр этим. Кини Маарыйа (Маайыкка) диэн ийэлээҕэ, 100 сааһыгар тиийэн баран өлбүтэ. Ол кыра эмээхсин олус бэһиэлэй кырдьаҕас этэ. Ксения кыыс сылдьан саһыл ферматыгар Иванов Мэхээлэни уонна Дьэбдьиэйи кытта үлэлээбитэ. Онтон хойут мин Тойбохойго үөрэнэ барбытым кэннэ сибээспит быста сылдьыбыта. Кэлин истибитим Ксениям Лукин Иннокентийдыын ыал буолан оҕо-уруу тэнитэн олорор эбит. Мин эмиэ ыал буолан, үс оҕолонон Сардаҥаҕа саҥа дьиэ туттан, дьүөгэбиниин уулусса нөҥүө-маҥаа ыаллыы буолан олохпут үтүө кэмнэрин бииргэ атаардыбыт. 1966 с. сайыныттан балыыһаҕа бииргэ үлэлээбиппит. Манна кини пенсияҕа тахсыар диэри санитаркалаабыта. Үлэтигэр олус бэриниилээҕэ, киһи быһыытынан сытыары-сымнаҕас майгылааҕа, оҕолоругар кыһамньылаах, намыын сыһыаннааҕа. Ол да иһин оҕолоро бэйэлэрин курдук көнө сүрүннээх, үлэһит дьон буола улаатан, билигин бары элбэх ыччаттаах ыаллар. Балыыһаҕа үлэлиирбитигэр Федорова Елена Николаевна врачтыыра. Сайын үгэнигэр саамай үчүгэй бырааһынньыкпытын – эмчиттэр күннэрин үөрэн-көтөн, тэрээһиннээхтик атаарарбыт. Сарсыардаттан киэһээҥҥэ диэри оҕолорбутун илдьэ айылҕаҕа тахсан, ас бөҕөтүн астаан, оонньоон-көрүлээн бөҕө буоллаҕа. Үлэбит тиллэн, наҕараада да ыларбыт, кыһыл көмүс чаһытыгар тиийэ баар буолара. Ол саҕанааҕы кэми, дьүөгэм Ксения Кононовналыын бииргэ үлэлээбит сылларбытын, иллээхтик-эйэлээхтик, өйөһөн, көмөлөсүһэн ыаллаһан олорбуппутун олус сылаастык ахтабын, саныыбын.