Тыыл, үлэ ветерана Лев Федотович ТИМОФЕЕВ туһунан

хос сиэнэ, үлэ ветерана, тыа хаһаайыстыбатын үтүөлээх үлэһитэ

Михайлова Татьяна Иннокентьевна:

Хос эһэм туһунан эһэм Егор Львович кэпсээниттэн билэбин. Лев Федотович 1869 с. төрөөбүт, үрдүк, көнө уҥуохтаах бааһынай киһи эбит. Уоллаах кыыс оҕолооҕо. Аҕата Сибирикиэп диэн политсыылынай киһи үһү, икки кылаас үөрэхтээх эбит. Кинилэр Кумакылаахха күөл уҥуор олорбуттар. Ол сири Лев өтөҕө диэн ааттыыллар. Аҕата эһэбин Егору үөрэттэрбэтэҕиттэн хомойоро. Элбэх сүөһүлээх буолан уолугар сүөһүтүн көрдөрбүт. «Кыһын ынахтарын отун эһэм сарсыарда 4 чааска туран икки сыарҕалаах атынан Улгумдаттан күн аайы тиэйэн кэлэр этим» диэн кэпсиирэ эһэм.

Лев Федотович нэһилиэк кулубатынан, кэнники Советскай былаас буолбутун кэннэ 1924-1926 сс. нэһилиэк сэбиэтин председателинэн үлэлии сылдьыбыт. Хос эһэм туһунан Нээлбиктэҕэ биригэдьиирдии сырыттахпына осеменатор, бостуук Иванов Петр Федотович маннык кэпсээбитэ: «1944 сыл диэки буолуо, Каганович колхозка Лев оҕонньор уолунуун Дьөгүөрдүүн иккиэн оттууллара. Лев от охсоро, уола Дьөгүөр кээһэрэ, Егоров Алексей (Чоҥой), Петров Николай Терентьевич атынан от тиэйээччинэн сылдьаллара. Лев Федотович 1945 с. оҕуруот аһын үүннэриигэ, харайыыга биригэдьиирдээбитэ, Нээлбиктэҕэ хаппыыстаны, хортуосканы үүннэрбиттэрэ. Ону таһынан Киэҥ ыарҕаҕа трунепсы, подсолнуҕу сиилэскэ анаан үүннэрэллэрэ. Хортуоска хостооһунугар оҕолор сылдьаллара: Иванова Мотя, Павлов Степан, Черепанов Хабырыыс, Степанова Александра, Степанов Петр бааллара. Миигин Лев оҕонньор мэлдьи бэйэтин кытта илдьэ сылдьара, аһатара. Кини миигин бултуурга-кустуурга үөрэппитэ, доруоп саатын уларсара. Хойут Букаайыкка бииргэ оттуу сылдьыбыппыт. Лев Федотович нууччалыы эрэ суруйара, сахалыы суруйбат этэ. Ньукуус оҕонньор, Петрова Ксения уонна мин көлө сиэтэрбит. Улгумдаҕа 140 тонна оту оттообуппут. Ол саҕана кураан буолан уута суоҕа, күөлэ уола сыспыта, онон от бөҕөтө үүнэрэ. Лев оҕонньор от түстүүрэ, уола Дьөгүөр үс көлөҕө (акка) тиэллибит оту соҕотоҕун кыдамалыыра. 10 тонна оту биир сиргэ кээһэрбит. Дьөгүөр уһун баҕайы кыдама атырдьаҕынан үөһэ ылан быраҕара, ону аҕата тэпсэн түстүүрэ. Сарсыарда эрдэттэн, киэһэ хойукка диэри үлэлиирбит. Дьөгүөр оҕонньор күүстээҕин, сылайбатын, үлэһитин сөҕө көрөрүм. Аҕата Лев Федотович үлэҕэ хойутууру сөбүлээбэт этэ».

Эһэм «Аҕабын аһара сөбүлүүрүм, суох буолбутун кэннэ улаханнык суохтаабытым. Мэлдьи бииргэ сылдьарбыт» диэн кэпсиирэ. Эһэм Егор Львович кэргэнэ Евдокиялыын икки уол, биир кыыс оҕоломмуттара. Оттон балта Александра Львовна уоллаах кыыс оҕоломмута.

Биһиги хос эһэбит Лев Львович 5 сиэннээх, 15 хос сиэннээх, 28 хос- хос сиэннээх уонна 21 хос-хос-хос сиэннэрдээх. Биһиги хос эһэбит олорон ааспыт олоҕун туһунан кэлэр көлүөнэдьон, ыччаттарбыт биллиннэр диэн тугу билбиппин, истибиппин суруйдум.