Үлэ ветерана

Мария Федотовна ГУРЬЕВА,

2015с. муус устар 6 күнэ:

Мин 1938 с. кулун тутар 15 күнүгэр Уксакыга төрөөбүтүм. Ийэм Николаева Матрена Николаевна, аҕам Николаев Федот Петрович күн сириттэн эрдэ бараннар, эдьиийим Наталья Федотовналыын төгүрүк тулаайах хаалбыппыт. Аҕам өттүнэн кырдьаҕас эдьиийбитигэр Тереясова Марияҕа иитиллибиппит. 7 саастаахпар таайым Гермогенов Николай кэпсэтэн Марбатааҕы детдомҥа киирбитим, ол саҕана дириэктэрбит Николаев Игнатий Яковлевич этэ, иитээччилэринэн Данилов Емельян Алексеевич, Федорова Дария Павловна, Николаева Евдокия Егоровна уо.д.а., повардарынан Александрова Анна уонна Уарова Марфа, ньээҥкэлэринэн Силимея уонна Черепанова үлэлээбиттэрэ. Детдомҥа барыта 60-ча оҕо буолан олорбуппут, детсадтан эҥин оҕолор кэлэллэр этэ. Детдом оҕолоро бары сүрдээх эйэлээхтик олорбуппут. Улахан уолаттар Үлэгиргэ тахсан оттууллар этэ, оттоон киирэллэригэр уолаттарбыт биһиэхэ лэппиэскэ кэһиилээх кэлэллэр этэ. Детдоммутугар ынахтаах, оҕустаах, ыттаах этибит, ол ыппытын таптаан Индусия Лакареевна диэн ааттаабыппыт.

Биһиги кыргыттар баайыынан, вышивканан дьарыгырар этибит, детдомҥа бортунуойунан Прокопий диэн киһи үлэлээбитэ, биһиэхэ оруобуна сөп гына таҥас тигэн биэрэр этэ. Мин детдомтан 14 сааспар тахсыбытым, салгыы бэйэм кэпсэтэн Сунтаардааҕы интернакка киирбитим. Онно биир сыл олорон баран доруобуйам мөлтөөн төннөн тахсыбытым. Оччолорго 8-с кылааһы бүтэрэн сылдьар кэмим этэ. Дойдубар тиийэн эдьиийбэр Наталья Федотовнаҕа Киирэпкэ олорбутум, кини онно ыанньыксытынан үлэлиирэ. Кэлин Марбатааҕы библиотекаҕа үлэлээбитим.

1962 с. Элгээйиттэн төрүттээх Гурьев Дмитрий Герасимовичка кэргэн тахсан Элгээйи Хоротугар көспүппүт, онно эмиэ библиотекардаабытым. Элгээйигэ олорон түөрт оҕолонон баран, дьиэ кэргэммин кытта төрөөбүт Бордоҥмор төттөрү көһөн кэлбиппит, бэһис уолламмыппыт. Дойдубар бочуоттаах сынньалаҥҥа тахсыахпар диэри арыы сыаҕар үлэлээбитим.

Билигин оҕолорум улаатан, үөрэхтэнэн, үлэһиттэр, туспа ыаллар. Миэхэ 7 сиэни, 7 хос сиэни бэлэхтээн дьоллоох эбэбин.