Тыыл, үлэ ветерана

Мария Гаврильевна ФЕДОРОВА туһунан

уола Федоров Владимир Анатольевич:

1929 с. тохсунньу 5 күнүгэр Хадаҥҥа Сытыган Оттоох диэн сиргэ төрөөбүт. Ийэтэ Федорова Матрена Капитоновна, аҕата Федоров Гаврил Иннокентьевич. Кинилэр 1938 с. Бордоҥ нэһилиэгэр көһөн кэлэн, ийэтэ детдомҥа, аҕата колхозка үлэлии киирбиттэр. Ийэм Марба оскуолатыгар 1-кы кылааһы бүтэрэн баран, сэрии буолан салгыы кыайан үөрэммэтэх.1941 с. Арҕаа Бэрэ ферматыгар сүөһү үлэтигэр көмөлөһөөччүнэн үлэтин саҕалаабыта. Кыайыгас-хотугас буолан «Балтараа Мааса» диэн дьон таптаан аат иҥэрбитэ. 1943 с. Уксакыга Кыһыл Баһыыка колхозка үлэлээбит. Онно икки этээстээх Куртах баай ампаарыгар элбэх буолан олорбуттар. Сайын тракторга косилканан от оҕустарыытыгар сылдьара. Сэрии бүтэрин саҕана Молотов колхозка мас кэрдиитигэр баран үлэлии сылдьыбыт. Ийэм ыарахан сылларга колхозка бэйэни харыстаммат үлэтэ «1941-1945 сс. Аҕа дойду сэриитин кэмигэр килбиэннээх үлэ иһин» мэтээлинэн наҕараадаламмыта. Сэрии бүппүтүн кэнниттэн эһэм Федоров Гаврил Иннокентьевич 1947 с., аҕам Андреев Анатолий Прокопьевич 1946 с. Аҕа дойду сэриититтэн эргиллэн кэлбиттэрэ. Кэлэн колхозка учуоччугунан үлэлээбитэ. Ийэбиниин 1952 с. Уксакыга билсибиттэр, мин 1955 с. күн сирин көрбүтүм. 1957 с. колхоз баанньыгар уонна гараһыгар истопниктаабыт, оччолорго гаражка биир полуторка, Урал-ЗИС уонна ДТ-75 гусеничнай трактор тураллара.

1959 с. Сардаҥаҕа көһүү саҕаламмытыгар ийэм эр дьону кытта тэҥҥэ тутууга араас үлэҕэ үлэлээбитэ. Күһүн хойукка диэри муохтууллара Ити курдук 1963 с. диэри үлэлээбит. Ыарахан үлэҕэ сылдьан сыыстаран ыалдьан Элгээйи балыыһатыгар икки ый эмтэммит. 1965-1972 сс. Бордоҥ учаастактааҕы балыыһатыгар завхоһунан үлэлээбитэ.

1972-1981 сс. Сунтаар сельпотун Бордоҥнооҕу бородуукта маҕаһыыныгар рабочайынан, биэкэринэн, атыыһытынан үлэлээн кэлбитэ. 1985 с. пенсияҕа тахсыбыта.Ол кэннэ Тэҥкэ учаастагар өссө түөрт сыл үлэлээн баран, 1989 с. үлэлээн бүппүтэ. Сельпоҕа үлэлээбит сылларыгар элбэх грамоталарынан, дипломнарынан, кыайыы үбүлүөйдээх мэтээллэринэн наҕараадаламмыта.

Ийэм баара буоллар түөрт сиэн, үс хос сиэн эйэҕэс эбэтэ буолуо, кинилэртэн күнэ-ыйа тахсыа этэ