Мартынов Николай Егорович 

Тыыл бэтэрээнэ, сэрии сылларын оҕото, СР бочуоттаах ветерана

Тыыл бэтэрээнэ, сэрии сылларын оҕото, Саха республикатын бочуоттаах ветерана,  "Партийная доблесть” орден кавалера, 89 хаарыгар үктэммит Мартынов Николай Егорович Сунтаар улууһун Бордоҥ нэһилиэгэр 1931 с. төрөөбүтэ. 

Уоттаах сэрии саҕаланарыгар Ньукулай 11 саастааҕа. Бордоҥ нэһилиэгэр сэрии сылларыгар үлэһит илии аҕыйаан 5 колхуос бөдөҥсүйэн 3 колхуос буолбута: "Каганович”, "Жданов”, "Кыһыл Баһыыка”. Колхозтаахтар биир өйгө-санааҕа түмүллэн стахановтыы үлэни тэрийэн, үлэ нуорматын ситиһэн, колхозка тиэрдиллэр байыаннай кэм булгуччулаах сорудахтарын, нолуоктарын толорору ситиспиттэрэ. Сүөһү кыстыыр отун оттооһун, хотоннор өрөмүөннэрэ, тутуулара, сылгыны бэрийии, көлүүр аттары айааһааһын, оҕуруот сабыыта, ходуһалары саҥа оҕуруоттааһын, бурдук сирин таҥастааһын, бурдугу ыһыы, хомуйуу, астааһын, кыһын от-мас тиэйиитэ, оттук маһы бэлэмнээһин, олорор дьиэни-уоту оҥостуу уо.д.а. үлэ барыта – нэһилиэк үс колхуоһугар хаалбыт оҕо-дьахтар, кырдьаҕастар санныларыгар сүктэриллибитэ. Оҕолор улахан дьону кытта тэҥҥэ үлэлииллэрэ. Ньукулай Марбаҕа "Кириэс төрдө” диэн сиргэ бурдук бааһынатыгар Федорова Мария Гаврильевна диэн оччолорго киниттэн аҕа саастаах кыыстыын күһүҥҥү паардааһын диэн аттаан оруос бурдугу ыспыттарын өйдүүр. Ол сыл күһүнүгэр астаах да астаах, ыҥыыр аттаах киһи көстүбэт бурдуга үүммүтэ. Онно хайҕаммыттара. Нэһилиэк үрдүнэн үс колхуоска барыта 864 ынах сүөһү, 565 сылгы баара. Үлэһит илии аҕыйах буолан биир отчут, сылгылыын-ынахтыын 16 төбө кыстыыр отун оттоон бэлэмниэхтээҕэ. Ньукулай сайын аайы үрэх баһыгар оттуура. Отуунан сылдьан түүннэри сменанан үлэлииллэрэ. Ону таһынан сэрии сылларыгар байыаннай бириэмэ булгуччулаах сорудаҕа түүлээх, балык былаана баара. Оччолорго тииҥ элбэх этэ. Сайын куобахха туһахтыыра. Турукта диэки Арбаҥдаҕа балыктаах баҕайы "Нэлэкэ” диэн күөл баара. Сэрии бириэмэтигэр ити күөл балыгынан салҕанан элбэх киһи хоргуйан өлүүттэн быыһаммыта. Холкуостар балыкка түспүт былааннарын ити күөлтэн хостууллара.

Николай Егорович сэрии кэнниттэн Армияҕа үс сыл сулууспалаабыта. Байыаннай суоппар үөрэҕин бүтэрэн, 1 кылаастаах суоппар квалификациялаах, ефрейтор званиялаах Армияттан кэлбитигэр райсовет суоппарынан үлэҕэ ылбыттара. Онтон ыла 45 сыл тухары салайааччылар суоппардарынан үлэлээбитэ. РСФСР суолун уонна транспорын Министерствотын 1 степеннээх "За работу без аварий” диэн түөскэ кэтиллэр знак хаһаайына. Сунтаар, Мэҥэ-Хаҥалас оройуоннарыгар, кэлин Дьокуускай куоракка Совмин, Обком салайааччыларын таспыта.

Сынньалаҥҥа тахсан баран Николай Егорович биир сөбүлүүр дьарыктаах. Кини Саха республикатын киинэ хранилищетын штаты таһынан оператора. Кини аатынан 23 нүөмэринэн туспа фондаҕа 500–чэ диискэ харалла сытар. Саха сирин аныгы историятын тыыннаах, хамныыр, өҥнөөх хартыынаҕа түһэрэн үйэтитэр дьикти дьоҕурдаах ветеран.

Олоҕун доҕоро Тамара Гаврильевналыын 3 оҕону иитэн-харайан билигин сиэннэрин, хос сиэннэрин көрөр дьоллоохтор.