Тыыл, үлэ ветераннара

Михаил Егорович ДОРМИДОНТОВ,

Ирина Николаевна САФОНОВА тустарынан

кыыстара Наталья Михайловна Дормидонтова:

Мин аҕам 1931 с. бэс ыйын 15 күнүгэр Хадан нэһилиэгэр Боруллуолаах диэн сиргэ төрөөбүтэ. Аҕата Сыкыров Егор Дормидонтович Хадан, ийэтэ 2-с Бордоҥ. 1935 с. Хадантан Бордоҥҥо көһөн кэлбиттэр. Бииргэ төрөөбүт эдьиийэ Маайа 1942 с күһүнүгэр ыалдьан өлбүт. Аҕам оҕо сааһа Улгумдаҕа ааспыт, Марбаҕа хааман үөрэнэн 7 кылааһы бүтэрбит. Куска тиргэлээн, куобахха туһахтаан аһылыктарыгар эбии гыналлар эбит.

1952 с. Элгээйигэ суоппар кууруһугар үөрэммит, онтон 1953 с. Ньурбаҕа механизатор үөрэҕэр барбыт. 1954 с. Дьокуускайга комбайнердар куурустарыгар үөрэнэн баран, дойдутугар бастакы комбайны аҕалбыт. 1962-1966 сс. УАЗ-69 массыынаҕа суоппардаабыт. Аҕам үтүөсуобастаах үлэтин иһин “1941-1945 сс. Аҕа дойду улуу сэриитигэр килбиэннээх үлэ иһин” уонна да атын үбүлүөйдээх мэтээллэринэн, бэлиэлэринэн, элбэх бочуотунай грамоталарынан наҕараадаламмыта, 1972 с. Сунтаар оройуонун норуотун хаһаайыстыбатын үтүөлээх үлэһитин аатын ылбытынан, коммунистическай үлэ ударнига, оройуон ветеран механига буоларынан мэлдьи киэн туттара.

1956 с. олоҕун аргыһын Максимова Ксения Алексеевнаны көрсөн ыал буолбуттар. Ийэм сэбиэккэ секретардыыра уһү, кыра уолун Радигы оҕолоноору эдэригэр суох буолбута. Радиону соҕотох дьахтар ылан ииппитэ, бырааттарым эдэр саастарыгар олохтон туораабыттара. Аҕам кэргэнэ өлөн икки кыра, биир саҥа төрөөбүт оҕолоох хаалан баран эһэлээх эбэм баар буолан көмөлөһөн киһи-хара буолбуппут. 1964 с. ииппит ийэбин Сафонова Ирина Николаевнаны көрсөн ыал буолбуттара, кыыстаах уол оҕоломмуттара.

Көнө-сымнаҕас майгылаах дьахтар түбэһэн, ийэ диэни билбэтэх киһи тутына билиммитим. Кини бэйэтэ Тэҥкэттэн төрүттээх, 1931 с. төрүөх. Сэрии сылларыгар 10-чалаах кыыс ийэтин батыһан хотоҥҥо сылдьыһара. Улаатан баран Бэттиэмэҕэ, Оторууска ыанньыксыттаабыта. Кэлин Валентина Гаганова ыҥырыытын өйөөн Петрова Ксения Николаевна, Омукова Анастасия Егоровна, Алексеева Зоя Алексеевна буолан Илимнииргэ тутуспутунан үлэлии барбыттар. Илимниир ферматын хаалыыттан таһааран, бастыҥ үлэлээх ферма ахсааныгар киллэрбиттэр. Үчүгэй үлэтин иһин В. И. Ленин юбилейнай медалынан наҕараадаламмыта, үлэ бэтэрээнэ буолбута. Москва куоракка Норуот хаһаайыстыбатын ситиһиилэрин быыстапкатыгар путевканан күүлэйдээн кэлбитэ, элбэх бочуотунай грамоталарынан, көмүс чаһынан, сыаналаах бириистэринэн наҕараадаламмыта.