МИХАЙЛОВ Конон Иннокентьевич

(1908-2010)

Наҕараадалара: кыайыы үбүлүөйдээх мэтээллэрэ, "Үйэ саас» бэлиэ.

1908 с. Хочо улууһун Бордоҥ нэһилиэгэр Бүппүт диэн сиргэ төрөөбүтэ. 10 ыйдааҕар ыалга ииттэрэ биэрбиттэрэ. Хараҕа суох аҕатын көрөн-харайан, киниэхэ сирдьит буолан кыайан үөрэммэтэҕэ. 1941с. сэрии саҕаламмытыгар балаҕан ыйыгар сэриигэ барарга бибиэскэни туппута. Ол кэмнэр тустарынан сэрии кыттыылааҕа Конон Иннокентьевич бу курдук ахтар: "Сунтаарга киирэн сатыы Туруктанан хас да хонугунан Ленскэйгэ тиийбиппит. Борохуотунан Амурскай уобаласка тиийбиппит кэннэ байыаннай чаастарга ыыппыттара. Миигин Даурия байыаннай чааһыгар анаабыттара. Манна сулууспалаабыппыт кэннэ Читаҕа ыыппыттара. Миигин: «Сааһырбыккын уонна хараҕыҥ мөлтөх» диэн сэрии хонуутугар киллэрбэтэхтэрэ. Бастаан мас кэрдиитигэр үлэлээбиппит. Дьэ, онно баар этэ үлэ кытаанаҕа, ас тиийбэтэ. Тоҥоҕун, дьон бөҕө ыалдьан өлбүттэрэ. «Ити кэриэтин сэрии хонуутугар сырыттарбын» диэх айылаах этэ. Мин дэлби ыалдьан, ыран киһи аатыттан ааһан эрдэхпинэ, командирым хата, «Байкал күөлгэ балыктааһыҥҥа ыытабыт» диэн дьаһайан онно ыыппыта. Дьэ онно тиийэн балыгынан аһаан, эмтэнэн киһи-хара буолан, бэттэх кэлбитим. Үлэлии сырыттахпына Читаҕа байыаннай собуокка үлэҕэ ыыппыттара, наладчигынан сэрии бүтүөр диэри үлэлээбитим. Сэрии бүппүтүн кэннэ хаалан 15 сыл онно олорон үлэлээн баран, дойдубар 1955 с. күүлэйдии кэлбитим. Туспа иитиллибит буолан бииргэ төрөөбүттэрбин кытары үчүгэйдик билсиспэтэҕим. Ол гынан төттөрү барбакка, дойдубар ыал буолан олохсуйан хаалбытым. Колхозка, совхозка араас үлэҕэ – сүөһү иитиитигэр, тутууга үлэлээбитим”.

Конон Иннокентьевич 2009 с. 100 сааһын томточчу туолан, Саха республикатын Президенин анал Ыйааҕынан «Үйэ саас» бэлиэнэн наҕараадаламмыта. Кини олоҕун 5 оҕото, 15 сиэнэ, 9 хос сиэнэ дьоһуннаахтык салгыыллар.

"Үйэ саас" бэлиэ туттарыы кэмигэр