Биһиги ийэбит Мыреева Анна Григорьевна Ленскай у-н Бэчиҥчэ бөһүөлэгэр төрөөбүт. Эрдэ тулаайах хаалан, сааһын эбинэн мас кэрдиитигэр сылдьыбыт.Урут Ленскайтан тутуу маһын кэрдэн сайын болуотунан Якутскайга аҕалаллар эбит. Онно кыргыттар биһиги "эр дьонтон хаалсыбакка тэҥҥэ үлэлиир  этибит"-диэн кэпсиирин истибитим.Ол сылдьан Сунтаартан кэлэ сылдьар огдообо киһиэхэ кэргэн тахсан Сунтаар оройуонугар кэлсэр уонна Светлана диэн кыыс оҕолонор.Эдьиийбит ыарыһах буолан олоҕо уһаабатаҕа хомолотолоох. Сэрии иннинэ биһиги аҕабытыгар Иванов Иван Федотовичка кэргэн тахсар, аҕабыт 1942 с сэриигэ барбытын кэннэ убайбыт Сергей 1943 с төрүүр.Сэрииттэн аҕабыт бааһыран кэлэн 1948с күһүөрү сайын күн сириттэн барбыт. Онон балтым Раялыын аҕабытын өйдөөбөппүт. Убайбытын аҕабыт аймахтара ылан ииппиттэрэ. Ийэбит бэйэтэ эҥин араас үлэни үлэлээн үс кыра кыргыттарын иитэр. Онтон биири өйдүүбүн. Бордоҥҥо марба диэн бөһүөлэккэ детдомҥа таҥас сууйарын. Миигин биир детдом оҕото Таня диэн кыыс оҕо оҥостор этэ.Кэһиитин кэмпиэт, хлеб аҕаларын өйдүүбүн. Онтон Бордоҥтон Тэҥкэҕэ оҕуһунан көспүппүтүн өйдүүбүн. Ол сылларга Тэҥкэ утары Рабочий диэн бөһүөлэк диэн баара.Онно Амакинскай экспедиция алмааһы,көмүһү көрдүүр партията турбута. Аэропорт баара, онно кыра самолёт кэлэн түһэр этэ. Ону көрөөрү биһиги оҕолор сырсар этибит. Өссө илин арҕаа фабрикалар тураллар этэ. Онтубут драгалар эбит. Кэлин бэйэм экспелицияҕа үлэлии сылдьан өйдөөбүтүм. 1952с сайыныгар балтыбынаан таһырдьа оонньуу сырыттахпытына, үһүөммүтүн ийэбит ыҥыран ылан "көрөҕүт дуо? ол суол устун киһи иһэр, кини эһиэхэ аҕа буолуо" диэбитигэр мин наһаа үөрбүтүм. Ол күнтэн ыла биһиэхэ Иннокентьев Егор Анисимович тапталлаах аҕа буолбута. Хаһан да мөхпөт,кыыһырбат этэ. Дьоммут бииргэ олорбуттарын устата куруук бииргэ сылдьаллара,доҕоор эрэ дэһэн ыҥырсаллара. Биир да күнү тэйсэллэригэр ахтыһар, суохтаһар этилэр. 4 оҕоломмуттара.

Ийэбит сүрэҕинэн ыалдьан ардыгар сытан хаалар этэ. Ыллыы-туойа сылдьарын олох өйдөөбөппүн. Ийэм миигин элбэххэ үөрэппит эбит. Ыалдьыт кэллэҕинэ кыыс оҕо ыалдьыты көрсөн чэйдэтиэхтээх,кэпсэтиэхтээх диэн чэй кутарга үөрэппитэ. Ас астыырга, килиэби хайдах мэһийэн баран буһарарга,кыра таҥаһы тигэргэ үөрэппитэ. Балтыбынаан олох кыра сылдьан муоста сууйан ону маны оҥордохпутуна хайҕанарбыт. Онтон улахан үөрүү суох этэ. Эрдэ бу олохтон баран хаалан алта оҕо, аҕабытынаан тулаайах хаалан эрэйдэммиппит. Улахан бырааһынньыктарга ийэбин саныы саныы пирожки, пельмен оноро сатыыр этим. Онно бука быра оҥорсон бурдук буолар этибит. Оҕолорго Ильина Евдокияҕа быстаран ырбаахы тиктэхпинэ саҕата сатамматын,ыстааным бууттарын холбуу тигэн кэбиһэн, үтүлүктэрим наар биир илии буолалларын,онтон да атын олох боппуруостарын эдьийим курдук киһибэр Дьэбдьиэйбэр сүүрэрим. Дьэбдьиэй наһаа да сырдык,аһыныгас дууһалаах киһи этэ. Сүбэлээн, уоскутан чэйдэтэн ыытара. Ол олордохпуна тастыҥ эдьиийбит Александра Якутскайга ыҥыран ылбыта,аҕам барахсан миигин көҥүллээн ыыппытыгар баччааҥҥа диэри махтанабын. Якутскайга кэлэн үлэлээн, вечернай школаны бүтэрэн,кэргэн тахсан 1970с Магадан обл. барбыппыт. Онно үлэлии сылдьан Иркутскай геологоразведочнай техникуму заочно бүтэрэн техник-геолог идэтин ылбытым.

Кэргэним Софронов Дмитрий Дмитриевич 1991с главнай геологынан үлэлии сылдьан ыарахан ыарыыттан күн сириттэн барбыта. Бэйэм оҕолорбун үрдүк үөрэҕи бүтэттэрэн баран 1997с Якутскайга кэлбитим. Оҕолор иккиэн манна бааллар,ыаллар. Кыыһым врач-химик,уолум горнай инженер.Үс сиэннээхпин.Улахан сиэним полиция үлэһитэ, икки сиэним студеннар. Күтүөтүм Афанасий Афанасьевич МВД полковнига, кийиитим Прасковья Романовна уһуйаан методиһа. Ийэлээх аҕабыт сырдык дууһалара өрүү биһиги сүрэхпитигэр, санаабытыгар бааллар.