НИКИТИН Петр Дмитриевич

(1913-1993)

“Память”, 4 том, с. 165

Наҕараадалара: “Хорсунун иһин”, “Германияны кыайыы иһин”, “1941-1945 сс. Аҕа дойду сэриитин кэмигэр килбиэннээх үлэ иһин”, «ССРС Сэбилэниилээх Күүстэрин 50 сыла», кыайыы үбүлүөйдээх мэтээллэрэ.

1913 с. бэс ыйын 24 күнүгэр Сунтаар улууһун Арыылаах нэһилиэгэр төрөөбүтэ. Ийэлээх аҕата эрдэ өлөннөр ыалга иитиллибит.

1941 с. бастакы хомуурга түбэһэн Аллаҥа нэһилиэгиттэн сэриигэ барбыта. Молотов куоракка тиийэн сыл курдук саппааска сытан үөрэммиттэр. Онтон 1942 с. Арҕаа фроҥҥа Великие Луки, Старай Русса, куораттары көмүскүүр, босхолуур уоттаах сэриигэ кыттар, Калининскай уобаласка, Дунайга хайыһар батальонугар, Украинскай, онтон Ленинград туһаайыытыгар сэриилэспитэ. Аҕыс төгүл, ол иһигэр үстэ ыараханнык бааһырбыт. 1943 с. ыараханнык бааһыран, инбэлиит буолан дойдутугар төннөн кэлэн Үөһээ Мэйиккэ Ойууһукка сэбиэт председателинэн үлэлээбитэ. Ол кэнниттэн колхозка сылгыһытынан, кадровай булчутунан таһаарыылаахтык үлэлээбитэ. Кини туһунан республика хаһыатыгар “Биир сыл 7 бөрөнү өлөрбүт сорсуннаах булчут” диэн улахан ыстатыйа тахсан турар. 1947 с. Павлова Ксения Семеновнаны кэргэн ылан Мэйиккэ ыал буолан олорбуттара. Онтон 1970 с. Бордоҥ нэһилиэгэр көһөн олохсуйбуттара. “Бордоҥ” совхозка араас үлэлэргэ үтүө суобастаахтык үлэлээбитэ, үчүгэй үлэтин иһин элбэх бочуотунай грамоталардаах. Сэрии кыттыылааҕа 1993 с. муус устар 3 күнүгэр уһун, ыарахан ыарыыттан өлбүтэ.

Петр Дмитрьевич уонна Ксения Семеновна 9 оҕону төрөппүттэриттэн билигин алта оҕолоро ыал эбэтэ, эһэтэ буолан үлэлии-хамныы сылдьаллар.

Улахан уолларын Павлов Никита Семенович диэн Ксения Семеновна сэриигэ баран өлбүт убайын аатынан ааттаабыттара. Кини Омскайдааҕы физкультура институтун бүтэрэн пенсияҕа тахсыар диэри оскуолаҕа физкультура учууталынан таһаарыылаахтык үлэлээбитэ, кэргэннээх, үс оҕолоох. Икки сиэн тапталлаах эһэтэ буолан Нам улууһугар олорор. Нина Петровна Никитина-Сергеева Новосибирскайдааҕы педучилищены, СГУ географическай факультетын бүтэрэн Сунтаардааҕы профтехучилищеҕа, Сунтаар администрациятыгар социальнай үлэҕэ үлэлээбитэ, биир кыыс оҕолоох, икки сиэннээх, билигин Хатаска олорор. Мария Петровна Бордоҥҥо балыыһаҕа, бытовой комбинакка иистэнньэҥинэн, Сунтаардааҕы профтехучилищеҕа маастарынан, Дьокуускай куоракка көһөн кэлэн баран Сахафармацияҕа үлэлээбитэ. Биир кыыс оҕолооох. Владимир Петрович суоппар үөрэҕин бүтэрбитэ, “Бордоҥ” совхозка суоппардаабыта., кэргэннээх, 3 оҕолоох, 2 сиэннээх. Билигин Бордоҥҥо олорор. Надежда Петровна СГУ историческай факультетын бүтэрбитэ. Кэлин СГУ “Технолог пищевой промышленности” идэтин ылбыта, өр кэмҥэ ФАПК “Якутияҕа», билигин “Алмазэргиэнбааҥҥа» кассир-счетчигынан үлэлиир, биир уол оҕолоох. Кыралара Татьяна Петровна Красноярскайдааҕы медучилищеҕа фармацевт идэтигэр үөрэнэн күн бүгүнүгэр диэри аптекаҕа үлэлиир. Дьокуускай куоракка олорор,кэргэннээх, биир уол оҕолоох, икки сиэннээх.