Николай Дмитриевич МАТРОСОВ

(1902 - 1944)

 Матросов Николай Дмитриевич, сэрии кыттыылааҕа. Бу кэм дьонноругар үксүлэригэр хаартыскалара, кинилэр тустарынан үчүгэй ахтыы да хомойуох иһин суохтар. Сэриигэ  барарыгар оҕолоро кыра буолан улахан өйдөбүл хаалбатах. Николай Дмитриевич 1942 сыллаахха сэриигэ барбыта. 1944 сыллаахха сураҕа суох сүппүтэ. Кэлин кыра уола Александр военкомат нөҥүө көрдөтө сатаабыта да ханна өлбүтэ чуолкайдамматаҕа. Сэриигэ ыҥыралларыгар Николайы бииргэ төрөөбүт убайын кытта талларбыттара: иккиэн элбэх оҕолоох этилэр. Онно кини тылламмыта. Соччо булчута суохпун, икки ыалы иитэр кыаҕым суох диэн. Николай Дмитриевич барарыгар кэргэнэ ыалдьан ороҥҥо сытан хаалбыта, ону кытары 5 кыра оҕону хаалларан барара ыарахан да этэ. Икки оҕо сэрии ыар сылларыгар өлбүттэрэ. Үс оҕо этэҥҥэ улаатан ыал буолбуттара. Кэргэнэ ыалдьа – ыалдьа оҕолорун көрөн, үлэлээн инчэҕэй тирбэҕэ быстыбатынан олорон 1951 сыллаахха суох буолбута.

   Кыыһа Матросова Акулина Николаевна, 1932 сыллаахха төрөөбүтэ. Оҕо сааһа сэрии ыар сылларыгар түбэспитэ. Аҕалара сэриигэ барбытын кэннэ ыал улахан оҕото буолан бырааттарын уонна балыһын кини үксүн көрөттөөбүтэ. Ийэлэрэ ыарыһах буолан аҕыйах үлэ күнүн аахсара, онон олус кырыымчыктык олорбуттара. Кэлин оҕолоругар быһыта орута кэпсииринэн атах таҥаһа суох буолан күһүн хойукка дылы уолаттар атах сыгынньах сылдьаллар эбит. Онно быраата Александр ынах сааҕар атаҕын сылытар этэ диэн ахтара. Наһаа ыарахан кэмнэр буолан сиһилии кэпсээбэт этэ. Акулина Николаевна ол кэмнэр охсоннор сылаабай, хачаайы этэ. Ферма ыарахан үлэтигэр сылдьан ыалдьан өр кэмнэргэ балыыһаҕа эмтэммитэ. Биирдэ оҕолоругар биһиги саамай минньигэс аһылыкпыт диэн тар хааһы буһаран боруобалаппыта, ону сиэбэтэхпит. Бэйэтэ аһара минньигэстик сиэбитэ. Кырыымчык кэмҥэ үөскээбит буолан аһы, таҥаһы сөптөөхтүк харайан барытын баар гынара. Биир киһи хамнаһын сөпкө туттан оҕолорун үөрэттэрбитэ. 4 оҕото бары анал үөрэх кыһатын бүтэрбиттэрэ. Кэргэнин Егор Филипповиһы кытта аһара өйдөһөн олорбуттара. Акулина Николаевна 1986 сыллаахха суох буолбута.