Үлэ ветерана

Николай Егорович ИВАНОВ:

Мин оҕо сааһым сэрии ыарахан сылларыгар ааһан, аччыктыыры, ыарахан үлэни, тиийиммэт-түгэммэт олоҕу эппинэн-хааммынан билбитим.Сир-дойду алдьархайы эмиэ билэр эбит дии саныыбын. Эрдэ, сэрии инниттэн кураан буолан барбыта. Онуоха эбии уот үлүгэр турбута. Оннооҕор ыаллар дьиэлэрэ кытта уокка былдьанара, биһиги эмиэ дьиэбит умайбыта. Дойду сиргэ от отой үүммэтэҕэ, туох бытыгыраабытын барытын аһыыка имири эһэрэ. Сир-дойду күл курдук бороҥунан көрөн сытара. Мин буола кытыытыгар монуолуу барар этим , табыыгабын нэһиилэ илдьэрим. Сайын аҕам оттуура, мин ийэбэр көмөлөһөн барааны көрөрбүт. Эдьиийим Марыына кыра эрдэҕинэ аһара ыарыһах этэ, абаҕата Аввакумнаахха олороро. Кыһын буолла да аҕабыт ыраах Өлүөхүмэ диэки тыалыы барар этэ. Түүлээҕи бултааһын былаанын толорорун иһин стахановец аатын иҥэрбиттэрэ.

Ийэм хаһан эмит бурдук буллаҕына суорунаҕа тардан мээккэлиир этэ. Оччоҕуна хааһылаан сиир дьоллонорбут. Ийэбит мэлдьи иистэнэн тахсара, этэрбэһи, бэргэһэни, ыт тириититтэн сону, ыт тыһыттан куллукуну, куобах тириититтэн үтүлүгү уонна арааһы барытын тигэрэ. Тириини бэйэбит имитэрбит. Сэрии сылларыгар олох ыараханыттан дьон ыалдьан, аччыктаан өлөллөрө.

Сэрии кэнниттэн комбайнҥа үлэлэппиттэрэ, онтон дизелист буолбутум. Дьэ итинтэн саҕаламмыта техникаҕа сыстыым. Үрдүк күүрүүлээх уот кэлиэр диэри дизелист-электригинэн үлэлээбитим. Онтон 1970 с. Сунтаарга суоппар курсугар үөрэнэн тимир көлөнү тэһиинниир, килиэптээн сиир идэлээх үлэһит буолбутум. Өр сылларга уу баһар массыынаҕа үлэлээбитим. Ол да гыннар күһүн аайы бурдук быһыытын кэмигэр комбайнҥа олорорум, бу үлэни олус сөбүлүүрүм. Бүлүү зонатыгар күрэхтэһиигэ 1-кы миэстэни ылбытым. Техника араас көрүҥүгэр таһаарыылаах үлэбин сыаналаан, элбэх төгүл социалистическай куоталаһыы кыайыылааҕын, үлэтигэр бастыҥ диэн ааттары ылбытым, Бордоҥ нэһилиэгин уонна Сунтаар улууһун бочуоттаах олохтооҕобун, тыа хаһаайыстыбатын үтүөлээх үлэһитэ ааты иҥэрбиттэрэ.

Сэрии буолбатаҕа буоллар сайдыыбыт ырааппыт буолуо этэ. Билигин олох дьэ тупсан иһэр. Сэрии эрэ буолбатар ханнык ...