Николай Иванович НИКОЛАЕВ

(1895- 1989 сс.)

Сэрии, тыыл бэтэрээнэ

Мин Аҕам Николаев Николай Иванович 1895 сыллаахха Тэҥкэҕэ төрөөбүт. Бииргэ төрөөбүттэр 11-т.  Бастакы кэргэниттэн 4 оҕолоох. Ийэбинээн София Федотовналыын 7 оҕолоохтор. Аҕа дойду сэриитин кыттыылааҕа, Үлэ ветерана. Ийэлээх аҕабыт барахсаттар сырдыкка- кэрэҕэ тардыһан, ханнык да күчүмэҕэйдэртэр толлубакка, иккиэн өйөһөн- өйдөһөн ыал бастыҥа дэтэн олус иллээхтик бииргэ олорбуттара.

Аҕабын кыра сылдьан да улаатан да баран тээтэ диэн ааттыырбыт. Ыал кырата буолан тээтэм ачаа кыыһа этим. Үйэтин тухары сылгыһытынан үлэлээбитэ. Кини туйаҕын хатаран убайдарым Бүөтүр, Өлөксөөндүр сылгыһыт үлэһитигэр өр сылларга үлэлээн кэлбиттэрэ.

Биһиги тээтэбитин кытта кырабытыттан от оттоһор, мас мастаһан, үлэ үөрүйэҕэр элбэхтик үөрэммиппит. Биһигини кытта күһүн тэбис тэҥҥэ отоҥҥо сылдьыһара уонна наһаа түргэнник хомуйара.

Киэһэ сытан эрэ кинигэ аахтаран истэрэ ону мин ааҕарым. Арыт сылайан, сүрэҕэлдьээн сорох сорох тылларын көтүтэн ааҕарым.

Бэйэтин наһаа кыанар этэ. Сүүрэн сорох сорохторбутун куоталыыра.

Аҕам 1989 сыллаахха бу олохтон 95 сааһыгар барбыта.

Кини үчүгэйдик үөрэр, куһаҕантан кэлэйэр, аламаҕай майгылаах, үтүө киһи этэ.

Киниэхэ тапталбытын, ытыктабылбытын хайдах да уус- уран тыл тиэрдиэ суоҕа.  Ол барыта биһиги өйбүтүгэр, санаабытыгар, сүрэхпитигэр быарбытыгар үйэ- саас тухары иҥэн сылдьыаҕа.

Ахтыы суруйда кыра кыыһа:

Индеева Зинаида Николаевна