Үлэ ветерана

Нина Васильевна ИЛТАКОВА:

Мин сэрии кэнниттэн тута баттаһан 1945 с. от ыйын10 күнүгэр Бордоҥҥо төрөөбүтүм. Элбэх бииргэ төрөөбүттэртэн түөрт буолан хаалбыппыт. Ийэм Данилова Марфа Федоровна эдэр сааһыгар өлөн 11 саастаахпыттан тулаайах хаалбытым. Кыра быраатым Владимир Данилов 5-с кылаастан Тойбохой детдомугар иитиллибитэ. Оттон мин Бордоҥ оскуолатыгар 8-с кылааһы бүтэрэн баран, 1963-66 с Бүлүүчээн оскуолатыгар интернакка олорон орто оскуоланы бүтэрбитим. Оччотооҕуга “Оскуола-производство-үрдүк үөрэх” диэн девиһинэн миигин райкомол секретара Пахомов И. О. дьаһалынан Хадан сельскэй кулуубугар сэбиэдиссэйинэн ыыппыттара, онтон эһиилигэр Илимнииргэ оҕо тубдиспансерыгар, Бордоҥ дьааһылатыгар ньээҥкэнэн үлэлээбитим. 1968 с. Дьокуускайдааҕы педучилище библиотечнай отделениетыгар үөрэххэ киирэн, бүтэрэн , Нам оройуонугар үлэҕэ ананан барбытым.

1969 с. Жорж Ринчинович Илтаковка кэргэн тахсан үс оҕону төрөтөн ыал буолан олорбуппут 45 сыл буолла. Манна дойдубар кэлээт орто оскуолаҕа библиотекарынан үлэлээбитим. Онтон 1982-1988 сс. “Бордоҥ” совхозка кадр отделын инспекторынан, 1988-1999 сс. Сунтаардааҕы пенсионнай сулууспа управлениетыгар пенсия түҥэтээччинэн, онтон 2004 с. диэри Бордоҥ администрациятыгар кассирынан, специалиһынан үлэлээбитим. Ити кэнниттэн түөрт сыл социальнай үлэһитинэн үлэлээн баран, билигин сынньалаҥҥа олоробун.

Бу сыллар тухары нэһилиэгим общественнай олоҕор төһө кыалларынан кыттан тиийэ\н кэллим. 1979 сылтан саҕалаан нэһилиэнньэ уонна тыа хаһаайыстыбатын перепистэригэр учаастак салайааччытын быһыытынан үлэлэһэбин. Уопсайа түөрт перепискэ кытынным. Итини тэҥэ быыбар хамыыһыйатыгар мэлдьи үлэлиибин.