Тыыл, үлэ ветераннара

Петр Афанасьевич МИХАЙЛОВ, Марина Егоровна ИВАНОВА

тустарынан уоллара Иванов Ньургун Петрович:

Биһиги аҕабыт 1927 с. күн сирин көрбүт. Ийэтэ кинини төрөтөөт да өлбүт, бииргэ төрөөбүттэр үһүөлэр. Дьылҕа хаан ыйааҕынан тулаайах буолан үс аҥыы иитиллибиттэр. Биһиги аҕабытын Иннокентий Михайлович диэн хараҕа суох оҕонньор ииппит, кини уол аҕыс сааһыгар тиийбитин кэннэ өлөн хаалбыт. Ииппит ийэтэ Харитина диэн эбит. Аҕабыт 1936 сыллаахха 9 сааһыгар Марбаҕа 1-кы кылааска үөрэнэ киирбит.уонна сэрии саҕаланар сылыгар бэһис кылааһы бүтэрбит. Харитина 1942 с. аччыктааһын кэмигэр өлбүт. Сэрии саҕаланыытыгаруон түөрт саастаах уол колхоз араас үлэтигэр эриллэн үлэлээн барбыт. Күнүс өттүгэр үлэлии-үлэлии түүнүгэр кольцевиктаабыт, кыһын хотон харабылыгар, сайын от, бурдук үлэтигэр улахан киһи курдук үлэлиирэ.

31 сааһыгар биһиги ийэбитин Марина Егоровнаны көрсөн ыал буолан, олохторун тэринэн, оҕо-уруу төрөтөн ыал тэҥинэн буолаллар. Иккиэн колхозка, совхозка сүөһү иитиитигэр идэтийэн үлэлээбиттэрэ. Ийэбит бастыҥ ыанньыксыт, сүөһү иитиитин кылаастаах маастара этэ. Кинилэр төһө да бастар бараммат баайдамматаллар, үрэйдэр көҕүрээбэт үптэммэтэллэр, харыларын күүһүнэн үлэлээн, үс уол, түөрт кыыс оҕону төрөтөн ньир-бааччы дьоллоохтук олорбуттара. Кинилэр сэмэй, үтүө быһыылаах, мааны майгылаах, кэрэҕэ-сырдыкка тардыһыылаах олохторун биһиги, оҕолоро, сиэннэрэ, хос сиэннэрэ, дьоһуннаахтык салгыыбыт.