Тыыл, үлэ ветерана

Петр Егорович ЛЕОНТЬЕВ туһунан

улахан уола Леонтьев Радомир Петрович,

2015с. олунньу 30 күнэ:

Аҕабыт 1917 с. төрөөбүт. Биһиги кырабытыгар Нээлбиктэ диэн улахан күөл соҕуруу өттүгэр Дьампа диэн харыйа ойуур ортотугар төп-төгүрүк өтөхххө олорбуппут. Дьиэбит ортотугар көмүлүөк оһохтоох ампаар тутуу, чугаһыгар туруорбах дьиэлээх, үүт уурар оҥкучахтаах, эт уурар подваллаах, тэйиччи алта атахтаах ампаардаах, сылгы хаһаалаах, улахан хотонноох, сүөһү даллаах этэ. Итиннэ эбии тэйиччи бурдук быьар буолалаах, сиилэс симэр дьаамалаах, сүөһүнү, сылгыны балай эмэ иитэр, бэйэбитин хааччынар ыал этибит.

Аҕам ийэбин Нуучча Бэһин Күөлэ диэн сиртэн сүгүннэрэн аҕалбыт буолуохтаах. Миигин оҕолоноругар ийэм 30 саастааҕа, ыал бастакыта буолан кырабар икки эбэ, ийэ иитиитигэр атаах соҕус буолуохтаахпын. Аҕам ийэтэ хараҕынан кыайан көрбөт буолан кырабар кинини сирдээн онно-манна, ыалга сылдьарбытын өйдүүбүн. Улгумдаҕа, Каганович колхоз сиригэр олорбуппут. Биирдэ биир сыарҕа эти, арыыны тиэйэн кэлбиппитин өйдөөн хаалбыппын. Ол аата ийэлээх аҕам элбэх көлөһүн күнүн аахсан, улахан дохуоту ылбыттарын аҕалбыт буолуохтаахтар. Аҕабыт сылгыһыт буолан дьиэбитигэр хонор хоноһо, сылдьар ыалдьыт кэриэтэ ыраах тэлэһийэ сылдьан үлэлиирэ. 60-с сылларга колхоз бөдөҥсүйэн, Попов Степан Спиридонович председателлиирин саҕана, элбэх саҥаны киллэрэн, сылгыны звеноларынан көрөллөр этэ. Онно Куруҥ түбэтигэр пенсияҕа тахсыар диэри үлэлээбитэ. Өр сыллаах таһаарыылаах үлэтин сыаналаан Саха АССР үтүөлээх сылгыһытын аата иҥэриллибитэ. Колхоз, совхоз, оройуон салалтатын элбэх грамоталара, Москваҕа Норуот хаһаайыстыбатын ситиһиилэрин быыстапкатыгар кыттыбыта, коммунистическай үлэ ударнига аат кини сыралаах үлэтин кэрэһэлииллэр. Алта оҕону иитэн, улаатыннартаан, үөрэттэрэн баран 1982 с. 65 сааһыгар эмискэ ыалдьан олохтон туораабыта. Кини олоҕун оҕолоро, сиэннэрэ, хос сиэннэрэ дьоһуннаахтык салгыыллар. Сиэннэриттэн Наталья Леонтьева международнай кылаастаах спорт маастара, Диана Афанасьева Москватааҕы Бауман аатынан университеты ситиһиилээхтик бүтэрбитэ, Айаал Леонтьев Айылҕа харыстабылын министерствотын юриһа, атын да оҕолор бары ситиһиилээх, үөрэхтээх, үлэлээх дьон буоллулар.