Тыыл, үлэ ветерана

Петр Федотович ИВАНОВ:

1930 с. от ыйын 10 күнүгэр колхозтаахтар дьиэ кэргэннэригэр төрөөбүтүм. Аҕам төрүт Андылаах олохтооҕо, ийэм Тойбохойтон төрүттээх.

Сэрии кэмигэр аҕабын Кэмпэндээйитээҕи туус собуотугар үлэҕэ ыыппыттара, балтыбыныын ийэбитин кытта хаалбыппыт. Ама да ааспытын иһин, киһи өстөөҕөр да баҕарбат ынырык сыллар этэ. Интернакка олорон 4-с кылааска үөрэнэ сырыттахпына 1942 с. кыһыныгар ийэм, балтым аччыктаан өлбүттэрэ. 12 саастаах кыра бэйэм кинилэри быыһаары куйуурдуу сатаабытым баара... Тулаайах кэриэтэ буолан эдьиийдэрбэр, аймахтарбар, интернакка олорбутум. Аҕам сэрии бүппүтүн кэннэ хойут төттөрү кэлбитэ. Тулаайах аҥардаах буолан, оскуолаҕа ситэ үөрэммэтэҕим, 12 сааспыттан колхоз араас үлэлэригэр миккиллэн барбытым. Колхозка үлэлии сылдьан ыраах тыаҕа, кэлтэгэй отууга түүннэри-күнүстэри уот оттон сылгы аһатан хонор, кыстыыр этим. Онтон хойут Нээлбиктэ ферматыгар бостуугунан, дизелиһынан үлэлээбитим.

70-с сылларга осеменатор кууруһун бүтэрбитим. Идэлээх киһи быһыытынан Маяк фермаҕа осеменаторынан совхоз ыһыллыар диэри үлэлээбитим.

1965 с. Иванова Дора Ефремовнаны көрсөн ыал буолан 6 оҕоломуппут. Элбэх сиэннээхпит, хос сиэннэрдээхпит. Быйыл сайын этэҥҥэ 85 сааһым буолар.

Үтүө суобастаах үлэбин бэлиэтээн В.И. Ленин төрөөбүтэ 100 сылыгар аналлаах үбүлүөйдээх мэтээлинэн, элбэх бочуотунай грамоталарынан наҕараадаламмытым, сүөһү иитиитин бастакы кылаастаах маастара буолбутум, тракторист, комбайнер бырааптаахпын.

Дьоллоох оҕо саас диэни билбэтэх ааппар үлэни өрө тутан, чөл олоҕу тутуһан ыччаттарбар дьоллоох оҕо сааһы бэлэхтээбиппинэн астынабын, киэн туттабын. Сэрии эрэ буолбатар, атына барыта бэйэлэриттэн тутулуктаах буоллаҕа.