ПОПОВ Федор Иванович

(1910-1993)

Наҕараадалара: Аҕа дойду сэриитин 1-кы степеннээх ордена, «Хорсунун иһин», «Японияны кыайыы иһин» мэтээллэр.

1910 с. Хочо улууһун Бордоҥ нэһилиэгэр төрөөбүтэ. Кыратыттан тулаайах хаалбыт ускул-тэскил сылдьар уолчааны Попов Иван Игнатьевич дьиэ кэргэнэ иитэ ылбыта, Оскуолаҕа үөрэммэтэҕэ, эрдэ айаҕын ииттээри, көмө-ньыма буолаары үлэлээн барбыта. Ааҕарга, суруйарга кэлин бэйэтэ үөрэммитэ. Эдэр сааһыттан күүстээх үлэҕэ эриллибитэ. 1928 сылтан туус хостооһунугар рабочайынан үлэлээбитэ. Армияҕа 1943 с. бэс ыйын 25 күнүгэр ыҥырыллан, Дьокуускайга хамыыһыйаны ааһан хас да оройуонтан 1208 буолан уһуннук айаннаан Мальтаҕа тиийбиттэрэ. Кылгас үөрэтии кэнниттэн саллааттары арҕаа-илин үрүө-тараа туппуттар. Үгүстэрэ арҕаа уоттаах сэриигэ барарга ыйаахтаммыттар, 308 киһини, ол иһигэр Федор Ивановиһы, Монголияҕа таһаарбыттара. Манна кини 17-с армия 61-с танковай дивизиятын 3-с мотострелковай полкатын 2-с ротатыгар сулууспалаабыт. Илиҥҥи фроҥҥа ордук кыырыктаах кыргыһыылар Улахан Хингаҥҥа буолбуттар. Биэс күннээх-түүн устата буулдьа ардаҕа сэллээбэтэх, түмүгэр дьоппуон армията чугуйарга күһэллибит. Бу кыргыһыыга Федор Попов төбөтүгэр ыараханнык бааһыран, госпитальга эмтэммит.

Федор Иванович 1946 с. армияттан эргиллэн кэлэн эйэлээх олоҕу тутууга активнай кыттыыны ылан барбыта. 1948 с. ыал буолан, икки уол уонна кыыс оҕону төлкөлөөбүтэ. Пенсияҕа тахсыар диэри фронтовик Кэппэндээйитээҕи туус собуотугар, онтон «Бордоҥ» совхозка, авиапорка рабочайынан үлэлээбитэ. Онон кини үлэтин уопсай ыстааһа 56 сылга тэҥнэһэр.