12:43 Прасковья Николаевна ТИМОФЕЕВА |
Прасковья Николаевна ТИМОФЕЕВА Математика учуутала Тимофеева Прасковья Николаевна СГУ-ну бүтэрээт Марба 7 кылаастаах оскуолатыгар ананан үлэтин саҕалаабыта. Мин 1956 с. күһүн нулевой кылааска, Марбаҕа үөрэнэ киирбитим. Улахан киэҥ түннүктэрдээх дыбарыас курдук дьиэ этэ. Оҕолортон куттанан түннүк таһыгар туран тахсарым. Оччолорого оҕо аҕыйаҕынан биир хоско хас да кылаас оҕото үөрэнэрэ. Онно алын кылааска сүрдээх дьээбэлээх Николай Герасимович диэн учуутал үлэлии сылдьыбыта, ону сөбүлүүрбүт, дьээбэлээх кэпсээннэрин бэркэ сэргээн истэрбит. Бөһүөлэкпит Сардаҥаҕа көспүтэ. 1961-62 үөрэх сылыгар Прасковья Николаевна кылаас салайааччытынан буолбута. Математика уруоктарын онуһу бүтэриэхпитигэр диэри үөрэппитэ. Үлэтигэр ис сүрэҕиттэн бэриниилээх киһи диэн кини этэ. Дьиэҕэ үлэ толорулларын олох ирдиирэ. Кыайан билбэт оҕолору уруок кэннэ ыҥыран эбии дьарыктыыра. Онон мин кини уруогар куһаҕан сыананы ылбыппын өйдөөбөппүн. Үчүгэй сыананы ылаары хонтуруолунай үлэни маныырым, туйгун сыана ылан дьоллонорум. Үөрэнээччилэргэ биир тэҥник сыһыаннаһара. Уруокпутун билбэтэхпитинэ мөҥүллэрбит ханна барыай, оннук гынан биллэрэн төннөрө. Ордук мин услуобуйалаах задачалары ыарырҕатар этим, билигин да хайаһарым буолла... Кылаас чаастарын бэрт интэриэһинэйдик ыытара, араас мероприятияларга биһиги кылаас наһаа активнайдык кыттарбыт. Ол сахтарга саҥа тэнийэн эрэр үҥкүүлэри "твист”, "шейк” биһиги эмиэ үҥкүүлүүрбүт, учууталбыт Прасковья Николаевна ону сэмээр көрөн эрэ кээһэрэ. Бордоҥ уон кылаастаах оскуолатын 1968 с. 15 оҕо буолан бүтэрбиппит. Ол кэмҥэ үлэ онтон үрдүк үөрэх диэн этэ, онон 3 эрэ буолан үөрэххэ туттарсар путевка ылбыппыт. Миигин идэлээх буоларбар, олох суолугар сирдээн киллэрбит учууталым барахсан Прасковья Николаевна буолар. Кэлин үлэһит буолан баран суруйсар этибит. Биирдэ күһүн Золоторева Галиналыын Ньурбачааҥҥа олордоҕуна бара сылдьыбыппытыгар үөрбүтэ даҕаны. Эдьийэ аах, тастарыгар дьиэ тутан биэрбиттэригэр олороро. Ол кэмҥэ учууталлыы сылдьара. Ирэ-хоро кэпсэтэн уруккуну-хойуккуну санаһан, Бордоҥун наһаа ахтарын, олоҕун сэһэргээбитэ. Ол кэннэ оскуола юбилейыгар кэлэ сылдьыбыта. Кылааһынан көрсөн, ахтылҕаны таһааран, сэһэргэһэн ким туох буолбутун ыйыталаһан, үчүгэйтэн үөрэн, ким эрэ ситэ үөрэммэтэҕиттэн хомойорун этэрэ. Учууталым Прасковья Николаевна үтүө санаатынан салайтаран, идэлээх буолан үлэ үөһүгэр сылдьыбыппар, үтүө киһибэр махталым муҥура суох. "Отличник фармации РС (Я)”, "Почетный ветеран фармации РС (Я)” бэлиэлэрдээх, СӨ үлэтин ветерана Иванова Зинаида Алексеевна
|
|