Үлэ ветераннара

Семен Петрович, Татьяна Афанасьевна АНДРЕЕВТАР

тустарынан уоллара Андреев Тарас Семенович:

Аҕам ийэтэ Кэтэриинэ Хадан нэһилиэгэр Хаанды эбэ кытыытыгар олохтоох Ээкэн тоҥус диэн киһи кыыһа үһү. Бииргэ төрөөбүттэр иккиэлэр эбит, убайа Дьөгүөр (Иннокентий Егорович Эконов аҕата) Аҕа дойду улуу сэриитигэр ыҥырыллан сэриилэһэр армияҕа сэрии бүтүөр диэри сулууспалаан баран кыайыы кынаттаах эргиллибит.

Аҕам Андреев Семен Петрович 1941 с. балаҕан ыйын 5 күнүгэр Сунтаартан сэриигэ бастакы ыҥырыкка барбыттар ортолоругар баара. 700-чэ буолан туос сатыы Туруктаҕа киирэн борохуотунан айаннаан, Ийэ дойду көмүскэлигэр аттаммыта. 1942 с. муус устар ый бүтүүтэ ыараханнык ыалдьан демобилизацияланан дойдутугар эргиллибит.

Ийэм Андреева Татьяна Афанасьевна Хадан нэһилиэгин Толстой учаастагыттан төрүттээх (Толстой учаастага 1948 с. Хадантан арахсан Сунтаар нэһилиэгэр холбоспута). Сэриигэ икки убайа – Спиридон уонна биирдэрин умнубуппун, быраата Тарас барбыттар. Сэриилэһэ сылдьан үһүөн сэрии толоонугар охтубуттар. Мин 1944 с. алтынньы 6 күнүгэр төрөөбүтүм. Кыайыы кэнниттэн аччыктааһын, хоргуйан өлүү тохтообута эрээри, ас- таҥас 50-с сыллар ортолоругар диэри кырыымчык этэ диэн кэпсэтэллэр этэ. Ийэм сэриигэ өлбүт быраатын кэриэстээн миигин Тарас диэн ааттаабыт.