(1932-2013 сс.)

Тыыл, үлэ  бэтэрээнэ.

Степанов Филипп Еремеевич, Дарья диэн түөрт оҕолоох ыалга 3 оҕоннон 1932с. төрөөбүт.

Тэҥкэ оскуолатыгар үөрэммит. 7 кылааһы бүтэрбит.

Армияҕа Сахалинҥа сулууспалаабыта, медицинскай чааска.

Армия кэнниттэн Сунтаарга тутууга үлэлээбит. Балыыһа, универмаг, остолобуой уо.д.атын дьиэлэри тутарга үлэлэспит. Кинилэр биригээдэлэрэ Элгээйигэ командировкаланан эмиэ тутуу бөҕөтүн туппуттар, аҕабыт прораб эбит. Ол курдук универмаг, остолобуой эҥин кини салалтатынан тутуллубуттар. Ол сылдьан оһоллонон тутууттан уурайар. Ити сылдьан Элгээйигэ санаторийга эмтэнэ сылдьар Спиридонова Татьяна Спиридоновнаны көрсөн, таптаһан 1961с. ыал буолаллар.

Элгээйигэ олохсуйарга быһаарыналлар. Бастаан ыалга дьукаах олорбуттар, онтон туспа дьиэ туттан киирбиттэр. 1962с.- Анатолий, 1966с- Олег, 1967с.- Андрей диэн оҕолор төрүүллэр.

Аҕабыт тутууттан уурайан баран Армияҕа сулууспалаабыт салаатынан балыыһаҕа үлэлии киирэр. Пенсияҕа тахсыар дылы дезинфекторынан, завхоһунан, онтон эмиэ дезинфекторынан үлэлээбитэ. Коллективыгар улахан ытыктабылы ылара, үлэтин таһынан туох баар общественнай олоххо, субботниктарга, самодеятельность көрүүлэригэр активнайдык кыттара. Сайын аайы балыыһа эр дьоно совхозка көмөлөһөн оттуу бараллара.

Ийэбит швейнай цехха, онтон Элгээйитээҕи Холбос филиалыгар рабкоопка харабылынан үлэлии киирбит. Киэһээҥҥи үөрэҕинэн оскуола 10 кылааһын ситэри үөрэнэн бүтэрбит. Инники ыалдьан ситэ үөрэммэтэх эбит. Ол кэннэ кэтэхтэн Якутскайдааҕы кооперативнай техникуму бүтэрэр, Новосибирскайга үрдэтиниигэ үөрэнэр. Счетоводтан саҕалаан плановик-экономиска дылы үүнэр. Профсоюз солбуйааччы председателя, общественнай үлэ, субботниктар, самодеятельностар кинитэ суох сатамматтар.

Аҕабыт маска наһаа уус этэ, убаастанар улахан балыксыт, кусчут курдук биллэр этэ. Кыһынын тииҥнээн туттарар этэ. Олус мындыр этэ. Ону манныкка көрөбүт. 1976с. телевидение көстүбүтэ. Онно ыаллар телевизордара алдьаннаҕына паяльнигын туппутунан тиийэн оҥорон биэрэр буолара.

Ону утумнаан улахан уол Анатолий Хабаровскайга телемастер үөрэҕин бүтэрэн телемастерынан үлэлээбитэ. Кэлин телевышкаҕа, ОДьХ электригынан үлэлээбитэ. Уус-уран самодеятельность активнай кыттыылааҕа, мелодист, аранжировщик, улууска, Элгээйигэ ыытыллар концертар көхтөөх кыттааччыта.  Анатолий билигин пенсионер. Элгээйигэ олорор.

Аҕата Серафим Филиппович С.А. Зверев ансаабылыгар тиийэ үҥкүүлэспит улахан үҥкүүһүт буолар.

Орто уол Олег бастакы үөрэҕинэн уруһуй учуутала, художник-живописец. Онтон М.К. Аммосов аатынан СГУ-ну бүтэрбитэ.

Якутскай куорат тэрилтэлэригэр, Худфоҥҥа художнигынан үлэлээбитэ. СГУну бүтэрэн баран Якутскай куорат Строительнай диэн уокуругун управатыгар үлэлии киирэр. Сыл аҥаара үлэлээн баран управа баһылыгын ЖКХ боппуруостарыгар солбуйааччытынан ананан өр сылларга үлэлиир. Билигин ИП буолан Дальневосточнай гектар программатынан ылбыт сиригэр "Чукул” диэн Айылҕа пааркатын тэрийэ сыльар. Үс уол оҕолоох. Кэргэнэ Ирина Петровна, айылҕаттан айдарыылаах иистэнньэҥ.

Кыра уол Андрей Сунтаардааҕы СПТУну бүтэрэн, столяр идэтин ылан Дьиэ тутуутун, мастан мебель оҥоһуутун маастара. Якутскайга олорор. Уол оҕолоох. Кэргэнэ Галина врач, суһал көмө сулууспатыгар үлэлиир.

 Ахтыыны оҥордо Олег Серафимович